🍁الحلقَــــ24ــة :القسـَــ3ـم 🍁
♥✳💚✳♥
مغمض عينو ومتكي على الكرسي وناظم بجنبو يسوق ، ملي شاف سيلين و مشاعرو داخلة بعضها ومخبلة ...الصراحة فرحان ...وبارشا ...ع الاقل مازال فمة امل ينجم يرجعلو تولين ...مصدوم ...صحيح ...بالاخير عمرو ماتخيل بين ليلة و نهار يلقى روحو بو ...اصلا ها الاحتمال ما حطهوش في بالو ...عندو لوم كبير عليها ...حتى لو عمل فيها وغلط في حقها ...مالازمش تخبي عليه حقيقة انو عندو بنية ...هي بالطريقة هاكي حرمتو منها وكانت معملة تزيد تحرمو ومن الظاهر ماكانتش باش تقلو ...تولين ايلي تحبو وتموت عليه ...معقول توصل بيها تمنع عليه بنتو ؟!.
حل عينو وخزر قدامو مفجوع وقت ركزت الكرهبة بيه بقوة "شنوة هذا يا ناظم ...طاير في الدودان " وقت ثبت مليح وشاف اودي كحلاء سادة عليهم الطريق فهم الحكاية وتوقع اش باش يصير بعدها ...طربق اركان وراه الباب لين صوتو تسمع عندو ..احمد زادا عندو حسابات معاه وهاو جابو ربي باش يخلص ايلي عليه ...حل الباب ونادى بيه وكشاكشو في لحظة من الزمان طلعت "انت واحد ما تسواش مخبي بنتي ها السنيـ..."
النون الاخيرة مشات مع الريح ...خاطر البونية ايلي جاتو من غريمو دورتلو رقبتو ...هوني عاد الحكاية استحقت ناظم يتدخل ...بالطبيعة موش باش يشوف خوه يتضرب ويسكت ...اما حتى احمد حب يرد الضربة و اختار قصبة ساق غريمو ولوحلها تحت الركبة ...تكابشو بعدها في بعضهم بين بونية وبين مشطة وبين راس وناظم مرة يحز ...ومرة يضرب تحت حس مس ...ماتفضت الحكاية كان ما تدخلت العباد . وبعدوهم على بعضهم ..اركان باقي ما فشش غيضو وقاعد يغلي ...تبع احمد وناظم يدخل فيه للكرهبة وصاح بصوت عالي
" المرة الجاية نسفرلك بروحك اذا قربت خطوة منهم الزوز ...هاذي الثانية ...انبهك فيها ...الثالثة مانيش باش نرحمك "
نفض ذراعات ايلي حزوه وبدا ينظم في حوايجو ايلي تمركسو ودخلو بعضهم "صفااا...صفااا...وفات الحكاية "
رجع لكرهبتو وسكر على روحو فيها ..تفقد وجهو في المرايا ومن الطاف الله ما كانش فمة اثار كبيرة للضرب ...جبد تاليفونو وطلب تولين مرة اخرى ...يمكن هاكي المرة عشرين ايلي يطلبها فيها وهي ماتهزش ...من الظاهر استحلت رجوع احمد وعاجبتها الفازة ...شاهية تربط خيوطها معاه ...تقلك بو بنتها ومالها كان هو... اضطر يطلب نزهة باش يطمن عليهم ...ومنها فهم شطر الحكاية وعرف زادا ايلي تولين مشات للدار ايلي شراها في تونس بعد ما عرسو ...ضرب الفولون وحط الفيتاس على اخرو ...هو ايلي صبر وتحمل وعدى كل شي ....هو ايلي لقفها وسترها وحبها من غير ما يطلب مقابل ...لو كانت حاسبتلو حساب كانت علمتو بايلي صار ...هي وبنتها الزوز مربوطين بلقب سويدي ...لواه مالا هو اخر من يعلمون ...طريق كامل وهو يغلي ...الدم فايرلو وعارف روحو النهار هاكي بالذات باش يخرج من صينتو معاها ...غير ربي يعديه على خير .
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Kurzgeschichten★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
