🍁الحلقـــــ24ــة : القســـ4ــم 🍁
✳♥✳
بارشا حاجات صارت من قبل لو تصلحت في وقتها كان الواقع حاجة اخرى ...بارشا مواقف كان لازم عليه ياقفهم وبارشا اسئلة كان لازم يعرف اجوبتهم ...لكن بعد اربعة سنين كاملين ...صعيب ياسر يرتق منها حتى شوية ...ايلي عملتو امو وهو كان شاهد عليه هو سبب من الاسباب ايلي دمرت خوه وصار الوقت اللازم باش يعرف في صف شكون ياقف ...
حل ناظم الباب متاع الاتولياي بقوة وطربقو وراه ...تلفتتلو زينب مفجوعة وڨحرتلو "ياخا ماتعرفش تحل الباب بالسياسة كي خلق ربي "
قربلها وهي وقفت من بلاصتها وقت فهمت من ملامحو ايلي فمة حاجات جدية ..سألتو خايفة "شبيك ناظم ؟! ...سمعت خبر خايب ؟!"
قعد يخزرلها لحظات ومن بعد خرجت الكلمات من فمو مغصورة "اييييه...سمعت ...وببارشا اخبار ..." قرب اكثر منها " منين تحب نبدالك ...بسي ولدك احمد ...والا بسي راجلك والا بناز "
رمشت متوترة "وه يا وليدي ...راك باش اطيحلي قلبي ...قلي احمد وفاضل لاباس؟!"
ماعادش عندو صبر ونطق من اجنابو " كيفاش باش يكونو لاباس وقت انت ياامي حطمتهم ..."
وساعت عينيها بصدمة " ناااظم ...تحكي مع امك راك ...من وقتاش صوتك يعلى عليا "
فاق على روحو ...وحاول يحكي بكل هداوة " امي ...كنت تعرف ايلي عمي مازال حي ..."
هبطت راسها ورجعت قعدت في كرسيها "ايه ... "
ناظم "امي عمي رجع ...وطلب بايو من ناز "
الخبر صدمها ...اما معادش تعنيها ها الافاريات هاكي علاه جاوبتو بلامبالاة " ايه وين المشكل ...الباي بايو وهو حر فيه "
ناظم "ناز متاعنا احنا ...شقينا عليها ها السنين الكل ...وزيد...علاش حد ماحكالنا عليه ...انت وبابا كنت تعرفوه عايش ...وخلتونا مصدقين كذبة انو مات ...!؟ "
نفخت زينب بقلة صبر " ماتدخلش في ها الحكايات يعيش ولدي .." رجعت ليلي كانت تعمل فيه "هيا ..اخرج وخليني نكمل ها الروب ...الجمعة الجاية عيد ميلاد ناز ...ولازم نورس وريما يظهرو بشكل يليق بعائلة بالرجب "
ضرب الطاولة ايلي قدامها "ماابرد دمكم والله .." عض شفتو اللوطانية " باهي ...خلينا نشوفو دمك يامي قداش باش يقعد بارد ..." بلع ريقو " تووولين..."خزرتلو طول وهو تبسم بتشفي ..."رجعت ..."
فمها تحل على كبرو ووجها بالوقت شحب "كيفااااه !!!؟؟؟؟"
خزر لوجها وتبسم بمرارة " الطفلة ايلي استدعيتها لدارك وقلتلها ماتناسبنيش ...رجعت ...وماهيش وحدها ..."قرب اكثر وخير يقول الكلمة بصوت واطي اما حروفو واضحة " معاها....بنتـها "
الصدمة معادش عندها بلاصة و قلبها تحس فيه طاح لوطة ومعادش لاقيتو ...بنتها ؟!...ياخوفها ايلي جاء لبالها صحيح...ياخوفها ايلي عملتو الكل طاح في الماء ...يا خوفها تكون الطفلة بنت احمد ...
ناظم وقت شاف وجهىا مشى الوان وجاء الوان ...عرف انو ايلي قالو كان قوي بارشا عليها ...والدم البارد ايلي كان يحكي عليه فاااار ...هو حكى حكى ...برى يزيد يرمي القنبلة الاخرى وايلي مازالت "وتعرف يامي ...سبحان الله ...ها الطفلة ...نسخة ...من احمد "
شهقت بصدمة ...ووساعت عيونها اكثر واكثر...عصر عليها قلبها وحست بفتفاتو سرح بين ضلوعها ...سألت بلهفة "...و...احمد...شافها ..."
عقد حواجبو مستغرب " هذا ايلي هامك ؟!...ياااامي ...قتلك تولين ام لبنية تنجم تكون حفيدتك ...وانت تسأل اذا شافها احمد والا لا ...لازم يشوفها ...واذا ماشافهاش هو نخلوه يشوفها ...." هز اكتافو مستسلم " ها الدار...ماكمش طبيعين ...حتى طرف "
على دورتو ايلي دارها جاء كف وغرزة مع ريما وهي واقفة في الباب ....وقتاش دخلت؟! ...وشنوة سمعت بالضبط ؟!...ومن وقتاش وهي واقفة فم؟! ....مايعرفش ...اما الظاهر انها سمعت الاهم وايلي كان كيف الكرطوشة صابتها في المقتل طول ...تمتمت وهي موش منجمة تصدق ...عبارة خيال والا منامة "بنت ...أحمد !!!!!"
💞نهاية الحلقة 24💞
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Short Story★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
