كيف أحيا معك!
الحلقه 4
منقوله من صفحة رواياتنا
عماد & أريج
.
.
عماد : باهي ليش تبكي توا قوليلي صاير معاك شي
أريج : خليني ابروحي
و نضت للدار و قعدت نبكي نبكي و عماد ولا عبرني ولا جي حاول يرضيني وبعد شوي نسمع فيه طلع وسكر الباب وأني هنا عرفت أن ماعنديش قيمة عنده و زدت بكي لين نعسني النوم ورقدت. .
.
.
مش عارف ليش قعدت تبكي هكي وشن صاير معاها وحسيتها ماتبيش تتكلم معاي ! قلت نطلع ناخذ الحاجات الناقصه ولما نرجع أكيده تكون هدت ونتكلم معاها بس عندها حق حتى اني مانتصرفش معاها زي أي راجل مع مراته ؟
وصلت الشقه القيت الدنيا امسكته دخلت الحاجات للمطبخ ومشيت طقطقت ع أريج بس ماردتش
عماد : أريج !
خفت يكون صايرلها شي فتحت الباب وخشيت لقيتها راقدة قربت منها كانت زي الملاك ودموعها قاعدات ع خدودها قعدت نمسحلها فيهم ومابيتش انوضها خلها أتريح شوي و اني نلمس ف وجهها فتحت عيونها حولت يدي طول وابتسمتلها
أريج : ليش طلعت؟
عماد :جبتلك اللي تبيه نوضي ديريلنا فطور
أريج : باهي
عماد: تبي انجي نساعدك في شي ؟
أريج : ههههه هو فطور وبتساعدني لا خليك تو انوتيه
.
.
درتله الفطور ورفعته للصاله وحطيته قدامه
عماد : شن هذا؟؟
أريج : خيره ماعجبكش !
عماد: لا عجبني بس ليش حاطه طاسه وحدة؟
أريج : أني ما خاطريش كول أنت صحتين ع قلبك
عماد : باهي تعالي أرفعيها السفرة حتى أني معاش نبي
أريج : الله عماد قلتلك أني مانبيش كان نبي راهو فطرت معاك
عماد: واني كان مافطرتيش معاي مش فاطر
أريج ابتسمتله: باهي انجيب طاسه وانجي
عماد: بسرعة جيعان . .
هههه حتى أني جيعانة يا سيد عماد غير نقيس في غلاي . . لقطه حلوة منه نستني في قصه الرسايل وكل شي وجيت احداه وقعدنا نفطروا
أريج : انصبلك شاهي؟
عماد: اي صبي صبي
أريج : حاضر من عيووني
عماد : تسلملي عيونك . . . هههه قصدك اتحشمي مني
أريج : ههههه شن نتحشم معاك . . عادي
عماد: باهي توا بعد رقتي قوليلي خيرك الصبح
أريج : شي
لما سألني خيرني اذكرت الرسايل والبنت الي يحبها قعدت انقول ف خاطري انتي تزلبحي ف روحك يا أريج هو مايحبكش ومايبيكش و سكتت لا عاد ضحكتله ولا تكلمت معاه و خنقتني العبره بس حبست ادموعي
.
.
كملنا الفطور وأحني ساكتين خاطري نفهمها البنت خيرها مرة تضحك و اتهدرز وفجأة تقلب عليك
أريج : الحمدلله
عماد : صحة
أريج: سلمك
عماد: أغسلي الأماعين و وتي روحك بيش نمشو لاماليا
أريج: عطيني ساعة وانكون جاهزة
.
.
درت دورتي ولبست وطلعنا لحوش أهل عماد حسيت روحي فرحانة ع الأقل نغير جوي ومش ح نشوفه . . أول ماوصلنا لقينا مروة و ريما في الجنان سلمنا عليهم وخشينا لاقتنا عمتي
أريج : السلام عليكم ، كيف حالك ياعمتي؟
أم عماد : الحمدلله وينكم أمس مش قلتو بتجو اتهدرزوا
أريج : هذا هو مشيت لأماليا العشية سلمت عليهم روحت الليل
أم عماد: إيه قولي هكي هلك أولى راكم عالأقل جيتو تغذيتو بعدها مشيتو راهو ماحد قايلك لا شورك عند راجلك
أريج : لا والله مش هكي ياعمتي
وقطعني عماد
عماد: يمى قبل أريج تبي اتجي غير اني مانضتش كان الساعة 3
أم عماد : كان تبو اتجو راهو جيتو الحوش قدامكم مفتوح والي يبي ايجي يامرحبتين بيه
بو عماد : مرحبتين مرحبتين بالعروس كيف حالك يابنتي
أريج : كويسه ياعمي كيف حالك أنت؟
بو عماد : طيبين ، اني طالع للحاج الفيتوري تبو شي من برا؟
أم عماد : لا سليمتك ، كان نبي شي تو نقول لولدي ايجيبلي
بو عماد: هههههه باهي ربي يخليلك ولدك
عماد: يمى اني قديش بنلحق ع حاجة تو كان تبي شي وصي شيبانيك ههههه خلاص قعد عندي حوش
أم عماد : شن هو اللي بتجيبه غادي داب فطور وخلاص و غذاكم وعشاكم هنا ولا تبي تقسم
عماد : لا يمى شن نقسم أني أصلا نبي ناكل معاكم
أم عماد شافت في أريج : لا غير نحساب
عماد: ههه هيا اني طالع لمربوعة عمي بنكسد مع الأولاد كان استحقيتو حاجه اني قريب
أم عماد: باهي ؛ أريج يابنتي خوذي راحتك ما اتحشميش منا
أريج : وين البنات خل نمشي احداهم
أم عماد : هاوينهم في الدار
.
.
أريج: السلام عليكم كيف حالكم بنات ؟ شنجوك صفاء حتى انتي هنا
أحلام + سلمى : وعليكم السلام تعالي تعالي كسدي
صفاء: ههههه أريج اني ديما هنا قريب نقعد مقيمة
أريج : ههههه حي شن الساعة هاذي محلاها امغلفه شكلها هدية من من ؟
صفاء: هذا ليش اني هنا داروني مرسال غرام هههه
سلمى: ههه اسكتي ياباردة . . هذي ذوق ولد عمي يا أريج شكله طايح فيا
أريج : هههه ذوقه حلو . . وأنتي طايحة ولا مش طايحه
صفاء : هههه قولي غرقانة لشوشتها حتى هو حمودي(محمد) خوي
أريج: الله الله ياسلمى احكيلي شكلك مانك ساهلة حتى انتي
سلمى: ههههه ماعندي ما نحكي انحبو بعض وخلاص
صفاء: هذا ياحنة من لما كنا صغار محمد ل سلمى وعماد ل صفاء هههه غير خوي كمل المشوار و عماد دار كبيدة وفاتني هههه و ياريته غير صار منها هههه
سلمى: صفاء شن اتخرفي انتي ، أريج مادوريهاش تخرط راهو
أريج: لا عادي أصلا عماد حكالي ع كل شي و نعرف بعلاقته السابقة
صفاء: ههههه هو أمتى لحق يحكيلك في هاليومين ، الي نعرفه زواجكم لا علاقة لا حب لاتعرفتو قبل الزواج
أريج: صح مش علاقه وماتعرفناش بس في حب ، الحب ايجي بعد الزواج
صفاء: أني انحسه هذا تعود مش حب تو سلمى شن رايك؟
سلمى فنصت في صفاء: مافيش شروط في الي زواجهم ينجح بدون علاقه والعكس عادي
صفاء : تو انتي كان قالولك سيبي محمد و يزوجوك واحد غصبا عنك لا تعرفيه لا يعرفك زي عماد عادي؟
أريج: خيركم علقتو خلاص ماصار شي ، نستاذن شوي نبي نشوف عمتي
نضت من احداهم ومشيت للحمام و قعدت نبكي حسيت روحي غريبه في مكان مش مكاني . . غسلت وجهي ومسحت دموعي وعدلت روحي وطلعت قعمزت احدا عمتي
.
.
عند البنات
سلمى: صفاء خيرك تحرجي في المرا هكي؟ بعدين هي عارفه ليش هالتصرفات
صفاء: دقيلي وشمه كانها عارفة حاجه غير تكابر تي لما تكلمت وجهها قعد ألوان ألوان
أحلام: صفاء راهو عماد متزوج وعمره ماقال يبيك ولا وعدك بشي و واضح انتي ليش اتصرفي هكي
صفاء: أصلا أني مش امدوراته وربي يهنيهم
أحلام: خلاص معناها ضمي فمك أني بنوض احدا أريج
سلمى: خلاص امشي وأحني لاحقينك
.
.
ام عماد: باهي الي طلعتي من هالدار كان نعرف شن عندكن 24 ساعه لاصقات فيها
أحلام: ههههه امكسدين يمى بعدين اهو جيت
أم عماد: باهي نوضي ابدي في العشي وارفعي مرت خوك معاك خل اتعود عالحوش وغدوة اذوقنا تطييبها
أحلام: هههه حلها يمى قاعده عروس
أريج : لا عادي هيا يا أحلام تو انوض حتى انساعدك
و نضنا اني واحلام ودرنا العشي وروحنا في الليل طبعا طول الطريق ساكتين . . أول ماخشينا الشقة خشيت غيرت دبشي وجيت بنرقد وخش عليا عماد! غريبه أول مرة مايطقطقش وقالي . . . يتبع
