💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

💚الحلقة 26 : القســ1ـم 💚

🎭الحلقــــ26ـــة : القســـ1ــم🎭
              ♥✴♥

ساقيها يتحركو بعصبية و يديها مغموسين بين خصلات شعرها وهي قاعدة على واحد من الكراسي  ،عقلها في هاك اللحظات والسوايع مانجمش يفكر ولا نجمت تقرر شي بخصوص حكايتها مع احمد ،  والدوامة ايلي فيها بنتها عمال تغرق بيها اكثر من قبل ...

من بعيد  ظهرت نزهة ،زربت في خطواتها ووجها شاحب واصفر ،ملي سمعت بسيلين جاتها تجري ساقيها اعلى من راسها ،  على اول ماشلقت بيها تولين  وحست بوجودها  ...وقفت وعنقتها  ودموعها هبطت بالوقت تقول تستنى فيها ،مسحت امها على ظهرها بامومة طاغية وهي تستفسر منها  "قلي شنوة حالها تو ؟!"

بعدت شوية عليها وحاولت تمسح دموعها وتهدي روحها باش " لاباس ...حبيت نخليها ليوم ضمانة واكاهاو اما طبيب قالي انجم نروح بيها "

سألت نزهة مستغربة " كيفاش جاتها الكريز !...على اساس مخليتها بعيدة ع التوتر والبكاء وخارصة عليها ...اش صار باش تمرض هكا "

مسحت وجها بكفوفها وحكت عينيها " تعبت ي.ًااااا امي تعبت ...تعبت من سؤال علاش ...وكيفاش... ووقتاش ...عييت من سمعان  الاسئلة ...وعييت من التفكير في الاجوبة " نفخت هواء كان مثقل صدرها " ها الليلة نحب نخمم كان في بنتي ...وصحتها ...يعيشك ...ماتحاولش تفهم مني ولا تسمع مني شي  ع الاقل  في الوقت الحاضر "
نزهة قعدت تثبت فيها نزهة من غير ماتحكي وتولين لعقت شفايفها  وخزرت لاخر الكلوار تشوفش حد داخل  " ياخا اركان وينو ؟!...شبيه ماوراااش وجهو جملة ...ع الاقل يطل عليها ...يعرفها متعلقة بيه وممكن جيانو يحسن من نفسيتها ...اما هو لا ...قاصد يخليني نعاني ...نهز راسي ونسبط وحدي باش  يزيد يقهرني "
نزهة " ...انت كلمتو ..."
تولين " ياخا انا باش لاهية ...ماناقصني كان نزيد نطلبو ونحاولو يجي يوري وجهو ...اومورو جاء والا الله لا باش جاء"
تنهدت نزهة وحاولت تبدل الموضوع " خنمشي نطل عليها "
تولين ما قالت شي واكتفت  بهزة صغيرة  براسها وخيرت تسند راسها ع الحيط وتغمض عينيها بتعب ظاهر على انها تقول كلمة وحدة .
             ♥✴♥
صحافة ...اضواء ...مشاهير ...ديكور ...ريسبسيون من جميع مكملاتها ...تنظيم كان برفاي ع الاخير  خلى الحاضرين الكل راضين و معجبين  باحتفالية عيد ميلاد ناز ايلي تعودو بيه كل عام ...وكيف كل مرة يتعمل ديفيلاي سبسيال بهاك المناسبة وتكون زينب هي المصممة ...ريما كانت العارضة الرئيسية ونجحت في انها تجلب الاضواء وتخلي تصاميم زينب تحلى في عين الموجودين ...حديث منا ومن غادي ...تصاور و تصريحات ...لمة وحديث مع شخصيات معينة ...مانجمت تاخو نفس كان بالسيف ...قعدت بحذى نورس وسألتها بلهفة "ياخا لتوا لا شرفو   احمد  وناظم يكونوش ماهمش جايين ؟!"
عضت نورس  شفايفها بغل " من الاحسن ما يورينيش وجهو خير ...خاطر كان شفتو باش نعيفو في روحو واندمو ع النهار ايلي وافقت فيه عليه...انا ...انا يحقرني ومايهزش عليا التاليفون نهار كامل ...وصلت بيه يعلق عليا ...انا نورس بنت عزوز ...ايلي حفات ساقيه باش وافقت عليه ...وشوف توا اش يعمل "
نفخت ريما وهي فاقدة الصبر " اوووف منك نورس ...انا فين وانت فين ..."تمتمت بينها وبين روحها " احمد موش من عادتو يغيب خاصة في مناسبة هامة كي هكا "
جات عينها على عبد الجليل وهو يدخل وحدو من غير مايكون بجنبو حد ...خممت لثانية وهي تخزرلو  ومن بعد قامت من بلاصتها ومشاتلو تتمايل بانوثة بحكم عارفة ايلي العينين عليها الكل ،وقفت بجنبو وهو يصب كاس ماء ويشرب "سي عبد الجليل !؟ "
لعق شفايفو ورجع الكاس لبلاصتو "ايه انا هو تفضل "
ضحكت بدلال "انا ريما ...ياخا نسيتني"
عقد حواجبو يحاول يتفكر وين شافها "سامحني ...نسيتك "
مدتلو يدها "انا ريما بنت عزوز "
قعد يخزرلها لحظات ومن بعد تصنع تبسيمة كانت ظاهرة انها فوق من قلبو "نتشرفو "
لوج بعينيه بين الحاضرين يراش اركان لكن ريحتو مافماش ...من العشية يطلب ويعاود وهو مايهزش ع التاليفون ،سألتو ريما "تلوج في حد "
الصحافيين   بداو  يشلقو بيهم  وهوما مع بعضهم و فيهم شكون حضر الكاميرا على امل يصور حويجة ،جبد عبد الجليل روحو منها وتبسيمتو مالية فمو "سامحني عندي قضية عاجلة لازمني نمشي "
هي طول عمرها المبجلة و لا حد نهار خلاها ومشى ع العكس ...كانو يخلو كل شي وراهم ويجوها ...لكن ها القاعدة تكسرت مع احمد ...وتوا مع ها الشايب ايلي يقول انو عم الراجل ايلي تحبو ...تبعتو بعين ضيقة تشعل غزول وهو يخرج  والظاهر انو موش كان هي اتبع فيه ...على خطوات منها كان الفاضل  بالسيف ما واقف على ساقيه ...ملي دخل عبد الجليل وهو يدو على قلبو ...خايف حد من الصحافة يسألو ويبربش وراه ...لكن وقت شافو يمشي والجو يفضالو تنفس براحة وخزر لزينب ايلي بجنبو "توا باش تحلى السهرية "
عقلها كان في عالم اخر مثقل بافكار وهموم الفاضل في حد ذاتو مايعرفهاش ...تبسم بالسيف وحاولت تظهر فرحة متصنعة ،لسنين مانستش واجبها كام وكزوجة وكمصممة ...وموش باش تنسى مهما كانت الظروف ومهما كانت المشاكل .