💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

💚الحلقة 26 : القســ3ـم💚

🎭الحلــقــــ26ــة : القســ3ـــم 🎭
♥❇♥

دقايق من بعد وكانت الشرطة فم وايلي حبو يغطوه ويلفوه من تحت لتحت ولى مكشوف واي حد كان موجود فم شاف بعينو وسمع بوذنو حكاية الطفلة الصغيرة ايلي تخطفت من وسط الكلينيك ، تولين معادش فيها حيل من البكاء ،لحد هاك اللحظة مازالت تتخيل انها في كابوس وباش يجي الصباح وتفيق منو ...تمنات لو تجي بنتها ونفيقها كيف عادتها ...لكن لا سيلين موجودة ...ولا هي تحلم .... جاوبت على الاسئلة متاع المفتش بالسيف وهي باش تشرق في شهقاتها ، حاولو يهدوها العباد ايلي تلمت فم وشي ايلي بيها موش ساهل يواسوها فيه .

سألها المفتش"متأكدة ها الشخص ماتعرفهوش ولا عمرك ريتو ...زيد ثبت مليح لعل بدنو والا حاجة من لبستو تفكرك بحد "

شاورت براسها لا " مانعرف حد ...ووجهو موش ظاااهر جملة كيف ماترى منين باش نتفكرو انا ؟!"

خزر المفتش للعون ايلي وراه " تعطو سيري الكرهبة للدوريات الكل ، قبل العشية لازم يجيني خبر انكم لقيتوها "

لبرا تحديدا قدام الكلينيك حبس كرهبتو وهبط منها يجري من غير حتى ما يسكرها ...الصدفة من جديد تحطو في مواجهة مع غريمو ...أحمد زادا حبس كرهبتو مقابلو بالضبط و هبط منها يزرب ... وقفو وجه لوجه و قعدو يتڨاحرو لبعضهم وكل حد قلبو يغلي ع الاخر ...و مافاقو على وضعهم كان ماتعدت وحدة من بحذاهم وهي تحكي ع الغريبة ايلي صارت في الكلينيك " قالك صغيرة جملة ...اربعة سنين والا هي تلاثة جملة "

صونت في روسهم الحكاية وفاقو انهم فم موش باش يتخابطو مع بعضهم ... وفي عوض قاعدين يضيعو في الوقت في هداري تافهة كيف مشاعر الكره متاعهم هاكي ،لازم يتحركو ويتحملو مسؤولية الوضع ...كل واحد منو يرى روحو هو المعني ...احمد كبوها الحقيقي ...واركان كبو عاطيها اسمو ...

اول ماجات عينين تولين عليهم خلت كل شي وراها وجرات ناحيتهم ...ساقين اركان حبست على بلاصتها ...ومانجمش يزيد يقدم بعدها ...مرة اخرى باش يكون درجة ثانية ومرة اخرى باش تختار احمد عليه ...امس عنقتو و ذابت في صدرو ...امس تفاهمو ياقفو لبنتهم وتفاهمو يحموها مع بعضهم من كل شر ...اما ما كانوش متصورين انو ها الشر باش يجيهم فيسع وقبل حتى ما تمتان علاقتهم من جديد ...المصايب ماتستناش ...اما الفرحة تبطى .. لازمها بارشا وقت وبارشا صبر ...لكن ...المرة هاذي باش يعفس على قلبو ...باش يفوت كرامتو وينسى مشاعرو ...وياما نساها بحضورها وبغيابها ...هو موجود لسبب واحد وايلي هي سيلين ...صحيح ماهوش بوها ...وماهيش منو ومابيناتهم حتى قطرة دم ...لكن ...موش باش يتغاضى ع ااحكاية ويتشمت لانو امها خيرت حبيبها الاول عليه ...مالازمش يحاسبها بذنبها ...

اما احمد فعالمو كان غير ...شوفتها وهي تجريلو و دموعها تطاير على خدها ،خلت قلبو يدق بقوة ، حتى بعد سنين مازال كل مايراها نبضاتو تقوى و يمكنو احساس غامض يخلي داخلو هش ع الاخير ،ممكن لانها على طول نقطة ضعفو ...اذا هي قربت منو خطوة فهو باش يقرب منها خطوات ...ومادام هي جراتلو فهو حاضر باش يكونلها الصدر الحنين و الكتف ايلي تبكي عليه...جرى ناحيتها بلهفة ومنى روحو بلحظة من الخيال ،اللحظة ايلي تعنقو قدام العالم الكل وتخليهم يشوفو انو هو ايلي ملك قلبها ومازال باش يملك ...لا بعدو ولا قبلو حد.