🎭الحلقــــ26ـــة : القســـ4ـــــم 🎭
♥❇♥
تولين مجروحة منو وجرحها مازال اخضر مابراش ...مازالت مانساتش ايلي عملو فيها من اربعة سنين وهي حكات هكاكا باش تنتقم منو وترجع ثارها لا اكثر لا اقل ...لذا ماهوش باش يلومها وباش يحسب روحو ماسمعهاش ...لكن اركان ...ماهيش باش تتعدالو بالساهل ...باش يندمو ع النهار ايلي خمم فيه ياخو حاجتو منو ...خزرلو على جنب وهو ياقف قدام المفتش
"السيد هذا هو ايلي خطفها ...ومعروف علاش اذا تحب نقلك عليه نقلك ...صحيح الطفلة باسمو اما من دمي انا ...بنتي انا ...ثبتو اذا تحبو ..شوفو تصويرتها تو تلقاوها نسخة مني ...وماتشبهلو في شي....انا بوها موش هو "
تأفف اركان بقلة صبر،الحديث هذا كيف المسمار يضرب في راسو ومخلي اعصابو تتكبس والدم يطلع لراس "سيد المفتش...اذا عندك حاجة ضدي والا دليل يثبت كلام ها السيد تفضل حط المينوت واخدم خدمتك ..اما اذا كانت ها الحكاية بلوط وتلفيق فنتصور عندنا حاجة مااهم نتلهو فيها ...فمة بنية صغيرة ومريضة مخطوفة وبين يدين حد مايخافش ربي ...اي دقيقة نوخروها باش تكون دهر عليها هي.. "
ضيق المفتش عينيه ومط شفايفو وهو يخزرلو بشك ظاهر "سي اركان ...ليوم الصباح وين كنت ...بين الستة ونص والسبعة ...؟! "
حلت تولين فمها ماردتو....من كل عقلو يتهم فيه ...تبسم اركان بغلبة " كنت هايم في الشوارع ...ميسالش ماهو !؟ "
صاحت تولين وهي تتنفض من العصب"قتلك اركان مستحيل يخطفها..." ڨحرت لاحمد " اذا فمة حد عندو مصلحة في خطف بنتي فهو هذا ....هو وعايلتو ...عايلة بالرجب هوما وراء ها الحكاية وسبق و هددوني "
نفخ المفتش وواجهها بنبرة حازمة " مدام انت قلت من الاول ماعندك شك في حد ...شنوة تضارب الاقوال هذا ؟! .. "
فركت شعرها بعصبية وبللت شفايفها الشايحين وحاولت تخلي كلامها موزون ومفهموم " كنت موش في عقلي ومصدومة من ايلي صار لبنتي ...وتوا رجعلي شاهد العقل...السيد هذا ...عندو ايامات صدم عليا وحب يفكهالي بالقوة ...وديجا فمة محضر في الحكاية هاذي...والسيد هذا موش كيما تراه ..هذا شخص عنيف ومريض نفسي... ضربني قبل و استعمل قوتو ضدي ..."
طول جات لبال اركان حالة تولين قبل باربعة سنين ...وقتها عرضتو بعد ماطردتها زينب من
دارها ...يتفكر لحمها كان ازرق و وظاهر على وجها اثار متاع ضرب...كان شاكك فيه وقتو وتوا بكلامها تأكد ...كبس بونيتو لين تطرشقت صوابعو وتسمع تكتيكها .. سيطر على اعصابو بالسيف ...رغم ايلي كلاتو يدو على بنية تفرعسلو وجهو خير مايردش الفعل ويأجل ها الحسابات لمرة اخرى.
بلع احمد ريقو "ايه ..اسألها ...علاش صدمت عليها؟! ... ماحبيتش نفكها كيما تحكي ...هي منعتها عليا وقعدت مخبيتها اربعة سنين كاملين...!...تخيل انو انا بو لبنية ومافيباليش ..."
جاء واحد من الاعوان قص عليهم خوماضتهم
"سيدي... جاتني اخبارية تقول ايلي لقاو الكرهبة ايلي نلوجو عليها في جبل قريب من هوني "
شدتو تولين من ذراعو وسألت بلهفة "لقاااو بنتي؟!!!"
ماجاوبهاش وجبد ذراعو منها وقعد يستنى في تعليمات عرفو ايلي شاورلو لاركان و احمد
"هزهم الزوز خلي يعطو بحثهم ..." شاور لبقية الاعوان " ه ... خلونا نمشو للبلااصة ايلي لقاو فيها الكرهبة ...فيييسع"
🎭❇نهاية الحلقة 26 ❇🎭
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Historia Corta★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
