💕أنت قلبي٢💕

الحلقة ٧٢

#انت_قلبي٢
#بوسي_مصطفى
_______________
الحلقة ٧٢

سلمى : اوعي بقى سبيني
وفتحت سلمى باب الغرفة
سهر تمسك ايدها
و سلمى تبعدها بكل قوتها  اسر يلحقها قبل ما توقع على الأرض.
و هو ممسك ايدها : هو في ايه؟
سهر : ثواني بس يا اسر.
ونزلت سهر جري خلف سلمى.
اسر : في ايه يا منه؟
منه : سلمى قالت الحقيقة يا اسر
مكذبتش.
اسر : أنا مش فاهم حاجه !
________

في الجنينه...
سهر : استنى بقى انتي قطعتي نفسي !
وتمسك ايدها توقفها : يا بنتي بقولك اقفي بقى.
سلمى : عايزة مني ايه يا سهر؟
يا اللي كل خوفك إن اسر يسمع كلمة من اللي قولتها لمنه
مع إني مقولتش غير الحقيقة.
خايفه على بيتك وجوزك حقك يا بنت خالتي.
بس افتكري إن ابن خالتك دا
كان مستعد يتحدى الكل علشانك
هو اللي.....
سهر تقاطعها : ياريت يا سلمى لما تيجي تتكلمي تاخدي بالك من الوقت والمكان اللي بتتكلمي فيه
إياد منكرش انه له مواقف كتير اوي معايا كان جدع وراجل بجد و أنا مستحيل أوافق على اهانته
زي ما أنا كمان مش هسمح ب اهانة الراجل اللي عايشه
في بيته.،ولا هسمح إن ولاده يسمعوا كلمة من اللي قولتيها
عن جدتهم، ايوه انا بحافظ على بيتي وولادي وجوزي و دا حقي، و مش معنى دا اني قابله ب إهانة ابن خالتي،بس لو عايزة تقولي الكلام دا روحي قوليه لمامت منه متجيش هنا تكسريها، هي تعبانه كمان، واحنا ستات زي بعض يا سلمى مهما كان اللي حاصل بيني وبين امي برضه لما حد بيتكلم عنها ب اسلوب مش كويس بتوجعني وانتي جيتي وجعتي منه اوي.
سلمى : واحنا وجعنا مأثرش فيكي يا سهر؟!
سهر : يا ادي سهر اللي عايزة تحمليها كل حاجه، يا سلمى انا قولتلك لو روحتي قولتي الكلام دا لطنط سعاد انا مش هزعل ولا حد يقدر يتكلم معاكي علشان هي افترت كتير لكن منه معملتش حاجه بالعكس طول عمرها جدعه معانا.
عمار يوقف قدام بوابة الفيلا.
ويرن الجرس يخرج البواب..
يفتح البوابه..
عمار : ايه اللي جايبك هنا يا سلمى؟؟.
سلام عليكم الأول..
يرددوا : وعليكم السلام.
سلمى : أنا ماشيه يا عمار متخافش.
عمار يمسك ايدها : طب تعالي اوصلك معلش يا سهر هبقي اجيلكم وقت تاني.
سلمى : اوعي سيب ايدي، هو انت فاكرني عيله صغيرة ولا ايه؟!
وبعدين انا مبكلمكش لا انت ولا الاستاذ التاني علشان قليتوا من قيمتنا وروحتوا قعدتوا مع سعاد وولادها والبيه جوز الست سهر.
سهر : تاني يا سلمى؟!
سلمى : لا دي اخر مرة اتكلم فيها خلاص.. بعد إذنكم.
استئذن عمار من سهر وخرج يلحق سلمى علشان يوصلها وفي الطريق يتكلم معاها شوية ويعاتبها.
____________

في البلد...
سعديه طالعه فوق السطوح بعد ما لمحت هنادي..
هنادي : امه!
سعديه : ايه يا بنتي اللي مقعدك في السقعه دي؟
انزلي اقعدي تحت قدام الشاليه يا بنتي دا أنا مولعه خشب يقضي الليل كله.
هنادي : مش عارفه يا امه ليه بقيت عايزة اقعد لوحدي
حتى العيال بسيبهم قاعدين  يذاكروا ولا يعملوا أي حاجه واخد جنب لوحدي لا عايزة اتكلم مع حد ولا حد يكلمني.
سعديه : ليه يا بنتي كل دا؟
هنادي : الناس بقيت مؤذيه قوي يا امه.
سعديه : من زمان وهما كده يا بنتي بس انتي كنتي صغيرة ومتعرفيش حاجه.
هنادي : بعد طارق عرفت الدنيا على حقيقتها يا أمه وقبلها كمان.
سعديه : اوعي تكوني زعلتي من الكلام اللي قولته
لوائل يا هنادي.
هنادي : الكلام دا كان في قلبي من زمان يا امه بس أني مكونتش عايزة أذيه ليه.
سعديه : و هو اللي اتقال في حقك دا مش أذيه ليه برضه
يا بنتي؟
دا انتي يا بنتي طول عمرك في حالك اتجوزتي صغيرة وعيشتي بعيد عننا وعمر العيبه دي مخرجت من بوقك يقوموا يطلعوا الكلام دا عليكي.
هنادي : حقي هيجيلي يا أمه من غير ما مخلوق يتدخل.
اني عارفه، علشان عمري ما ظلمت حد.
سعديه : عارفه يا بنتي، انزلي اقعدي في وسط عيالك يتونسوا بيكي بدل القعدة في السقعه دي.
هنادي : حاضر يا امه.
سعديه : ايه يا بنتي مش قادرة تقومي ولا ايه؟!
هنادي : كبرنا بقى يا أمه ههههههههههههه
سعديه : كبرتي ايه بس يا بنتي، انتي لسه روحتي ولا جيتي ؟!
______________