حًسِيَنِ وٌهّآجّر

البارت 1

قصة حقيقية وابطالها على قيد الحياة الشاب اسمه حقيقي والفتاة اسمها مستعار وطبعا نشرت القصة بموافقتهم الشاب اسمه حسين موالد 1943 الشابة اسمها هاجر (الاسم المستعار) موالد 1953 حسين ابن عم هاجر وساكنين بيوت الشعر (البداوة) ويترحلون من مكان الى اخر بسبب وجود المعيشة لأغنامهم حسين اكبر من هاجر ب 10 سنوات وجانوا دائما

ساكنين قريبين على بعض ابو هاجر شراني وشرس وميحب اقاربه ولايريد يرتبط بيهم بعلاقة ولايزوجهم من بناته ولا ولده يتزوجون منهم والكل يعرف ان العرب البدو اكثر شي يتزوجون الاقارب وحسين معجب بهاجر من جانت زغيرة ودائما جان يستلطفها ومرت الايام والسنين وكبرت هاجر وصارت شابه وحسين ممفاركها ابد وعينه عليها وصار توادد

بيناتهم ونظرات واعجاب لان هيه كبرت وصارت مشاعرها تتحرك باتجاه الحب صاروا يحجون وي بعض من تروح تجيب ماي من البير ومرات يروح وياها لان بنت عمه محد يكدر يكول شي عليه واستمرت الحاله هيج وبعض من الاقارب الي قريبه بيوتهم من بيت حسين وعمه يعرفون ان حسين يريد هاجر وهاجر تريد حسين والبنات الي مع هاجر

يجيبن ماي يعرفن بالموضوع لان هنه بيوت قليلات وكل شي ينشاف وينعرف بقى بس ابو هاجر ميدري بالحب الي بين حسين وهاجر مرت الايام وحسين يتفاخر بهاجر كدام البنات والشباب وهاجر نفس الشي وجانت تصير مسابقات وحسين يحاول يطلع الاول حتى يعجب هاجر اكثر وهو جان شهم وقوي وميخاف ومرت الايام وحسين وهاجر يلتقون ومرات

حسين يروح لبيت عمه بالنهار ويكعد بالديوان مال بيت العرب (الشعر) وتجي هاجر تجيبله تمر ولبن لو جاي لو ماي هو عنده اهم شي يشوف هاجر ومرات اذا ما صارتله فرصه بانهار يخلي جيته بليل بس بسكته محد يدري ويروح ويجيبله عصا طويله ويكعد بيها هاجر يمد العصا من البيت الشعر ويخليها تلمس هاجر وتكعد ويحجون ويكعدون ويسولفون طبعا

هيه بنت عمه شرفه وعرضه وبعدين هيه حبيبته فمصار شي بيناتهم ابدا ولا حتى بوسه كل هذه الفترة ماكو شي ويوم من الايام حسين اجه بالليل يريد يشوف هاجر هاجر جانت نايمه واختها يمها وصايرة بين هاجر وبين المكان الي حسين دائما يكعد هاجر منه بالبداية مال بيت العرب حسين مد العصا يريد يكعد هاجر لمست العصا اخت هاجر وكعدت وشافته

حسين كالتله ها حسين شعدك هنا وشتسوي جاي بالليل كالها اسكتي صوتج لايسمعنه احد كالتله هسه والله اصيح ابوي واخواني واخليهم يكطعوك تكطع وظلت تحجي وياه وشعندك جاي وو كعدت هاجر ها خير شبيج خيه كالتها هذا حسين جاي نص الليل راح اكعد ابوي وشويه شويه حسين وهاجر سكتوها وحسين راح وهاجر ظلت تسكت بأختها وهدأتها

ورجعت نامت والصبح كعدن من الصبح للحلال وحلبن الحلال وجابن نار وسون ريوك وخبزن وكملن شغلهن وهاجر تطلع بالحلال واختها تبقى بالبيت فأختها شويه خبيثه راحت يم ابوها وكالتله بويه هاجر وحسين يمكن يردون بعض وحسين مرات يجي بالليل ويكعد هاجر ويسولفون كالها ها هذا حسين هيج ايسوي انه اعلمه كالتله لا بوية على كيفك

لاتتعصب هذا هم ابن اخوك وانته هسه بمثابه ابوه كالها لا بمثابه ابوه ولا شي وانه اعرف شلون اتصرف وياه

...يتبع