بسم الله ..قصه قصيرة بعنوان "زوجة منسيه "
تحذير: ممنوع النقل او النشر الا باذن مني شخصيا ......
......
.......
.....
صباح الخير يا عمة
صباح النور يا بتي، تعالي اجعدي افطري
لا مش عايزة، انا هتابع الوكل
اجعدي يا بت
بصيت ورايا بعد ما سمعت صوت جدي ورايا، روحت ووطيت وبوست ايدة، دي العادة هنا، لازم نحترم الكبير ونقدرة، اعرفكم بيا الاول، انا دنيا السوهاجي بنت عزيز السوهاجي الله يرحمة، عندي 23سنه،انا حكايتي غريبه شويه، وحيدة ابويا، امي اطلقت من ابويا عشان مش عايزاني وكنت عايشه في اسكندريه بس جيت هنا من سبع سنين، نسيت اقولكم اني متجوزة،مكتوب كتابي علي منصور السوهاجي ابن عمي، بس هو مش هنا، بابا لما تعب فجأة طلب مني اكلم جدي واقوله ان بابا عايزة ضروري،زي ما يكون حاسس انه هيسبني ويمشي، وفعلا جدي جة ومعاة عمي وابن عمي، وبابا طلب منهم انهم يجوزوني لمنصور ومهما حصل ما اروحش لامي، الغريبه ان منصور ما قالش اي حاجة، واتكتب كتابي وانا عندي 16سنه ولما كملت 18عمي سجله جواز رسمي بالتوكيل اللي معاة من منصور، بابا مات بعد كتب الكتاب باسبوع، كنت حاسه بالضياع والوحدة، ماما ماجاتش العزا بتاع بابا، انا معرفش اي سبب طلاقهم بالظبط بس بابا قالي انها ماكانتش عايزة اطفال، وحاولت كتير تخلص مني بس حكمة ربنا بقي اني جيت، وبعدها هي مشيت، ولما جيت هنا بيت اهل بابا عرفت ان منصور سافر بلاد برة، انا معرفش اسم البلد دي، انا مكملتش تعليمي بعد موت بابا الدنيا اسودت في وشي ...فوقت علي صوت جدي الحنين وهو بيقول ...
يلا اجعدي افتحي نفسي علي الوكل
حاضر يا حبيبي
روحت وقعدت معاهم علي الطرابيزة وكان موجود مرات عمي اسمها غاليه وانا بقولها يا عمة، وكان موجود عمي سالم وابن عمي واخو جوزي كريم، احنا بنحضر لفرح كريم وجدي قال ان منصور جاي عشان فرح اخوة، اخيرا بعد سبع سنين هشوفه، كنت بستغرب لما كان بيكلمهم وميسألش عليا، بس كنت بقول يمكن مش فاضي، لحد متاكدت انه مش فاكرني اصلا، بقيت كل يوم ابص للدبله والغوايش في ايدي وادعي ربنا انه يحبني،الدهب اللي ف ايدي جدي قالي انه شبكتي من منصور، ومن يوم ما لبستهم ما قلعتهمش،المضحك ان ديما بيجيلي عرسان، وجدي وعمي بيرفضو طبعا من برة برة، وبعرف بعدين، بقعد اضحك واتخيل لو منصور هنا كان هيغير عليا ولا لاء، كملت اكلي والبسمه علي وشي لما جدي اكد علي كريم يروح المطار بعد ساعة عشان يجيب منصور، كل اللي اعرفه عنة انه راجل اعمال كبير اوووي في البلد اللي هو فيها، اكتر من كدة معرفش،خلصت الاكل وقومت عشان اتابع المطبخ لقيت العمة بتقولي
رايحة فين؟
هشوف الوكل خلص ولا لا
بجي برضيك جوزك جاي بعد غيبه سبع سنين، ويجيلي يلاجيكي بخلجاتك دي، اطلعي يا بتي، اتزيني اكدة والبسي زين
ابتسمت بوجع والكل بيبصلي وقولت
مش هعشم نفسي يا عمة، هو مش فاكرني اصلا، انا اكدة مرتاحة
خلصت كلامي ومشيت روحت المطبخ قبل ما حد يشوف دموعي،دخلت المطبخ واكتفيت بحياتي كدا
.....
.......
في المطار
كريم واقف ساند علي عربيته ومستني اخوة الكبير، جواه مشاعر كتير اهمها ان منصور وحشه جدا، ابتسامه شقت شفايفة لما شاف اخوة خارج من بوابه المطار، جري عليه وحضنه جامد اوووي وهو بيقول
كيفك يا اخوي، اتوحشتك جوي
انا زين يا كريم، انت كيفك؟
زين يا اخوي،هات الشنط دي ويلا تعالي
شال كريم الشنط وحطها ف العربيه وقبل ما يلف لقي بنت زي القمر جايه ناحيتهم وتقريبا كدة مش لابسه حاجة وقالت لمنصور
مستر منصور كل حاجة تمام
ماشي يا دارين، يلا اركبي
مين دي يا منصور، وتركب فين؟
دي دارين، المساعدة بتاعتي
دي! !ليه هي لندن مفيهاش رجاله؟
مالك يا كريم في اي؟
انت عايز تقنعني ان دي هتدخل دار السوهاجي جدام جدك وابوي عادي
براحتهم ممكن انزل ف اي فندق، هتخلص ولا هنفضل واقفين ف الشارع
هخلص يا اخوي
....
.....
بعد ساعتين، دخلت عربيه كريم بيت السوهاجي،الغفر ضربو نار في الهوا عشان يعبرو عن فرحتهم، وخرج الجد وابنه ومرات ابنه عشان يستقبلو منصور، اللي اول ما دخل نسي كل حاجة حواليه وراح حضن امه
كيفك يا اما؟
انا زينه يا ضنايا، اتوحشتك يا ولدي
فضل الجد متابع اللي بيحصل بهدوء، لحد ما دخل كريم ووشه مكشر وباين عليه انه مضايق، وقبل ما يسأله عن السبب، شاف دارين وهي داخله البيت، فقال وصوته باين عليه الغضب
مين دي؟
اخيرا منصور ساب امه، ولف لجدة ببسمه وقال
طيب اسلم عليك الاول
جولتلك مين دي؟
دي المساعدة بتاعتي
وفين خلجاتها! !
وه يا جدي وانا مالي بخلجاتها
دي هتجعد في داري اكدة !
يا جدي ....
دنياااااا، دنيااااااا تعالي يا بتي
دنيا دخلت وهي باصه في الارض، مش هتقدر تبص لحد بعد ما شافت البنت دي معاة، ولكنها افتكرتها حبيبته ولا خطيبته لانها مسمعتش الكلام اللي دار بينهم وقالت
نعم
خدي الضيفه وطلعيلها خلجات من عندك تستر بيها نفسها
حاضر، اتفضلي
كل دا حصل ودارين ساكته، ودنيا خدتها ومشيت، اما منصور فضل بيصلها ويفتكر شافها فين قبل كدة، شكلها مألوف بالنسباله، مش فاكر شافها فين بالظبط
فاق علي ابوة وهو بيحضنه وبيهمس و يقوله
اكدة متسلمش علي مراتك
.......يتبع ......
مجنونه قلم
مني الاسيوطي
