🎪الحلقـــ27ــة : القســ1ـــم 🎪
✴✴💜✴✴
دوب ماوصلو للبلاصة ايلي نعتوهم عليها جرات للكرهبة المڨارية في وسط الشجر ...حلت بيبانها بلهفة ولوجت فيها لكن مالقات شي ,خزرت وراها للمفتش واعوانو "وينهي ....وينهي بنتي ...على اساس لقيتوها، شبيها مافماش !؟"
قدم ناحيتها المفتش وحب يهديها " مدام يعيشك لازم تتفهم الوضعية ...ايلي خطف بنتك هرب... خلى الكرهبة هوني وهزها ...يعرف مليح انا باش نتبعوه بالسيري متاعها "خزر على جنابو للبلاصة " لكن ماهوش باش يبعد من هوني ...اكيد دخل في ها الغااابة ...المخارج الكل فيها دورياتنا و تصويرة بنتك عندهم ...ذبانة ماتطيرش من غير علمهم ...المسألة مسألة وقت ..."
صاحت "ايييه ...فاش تستناو باش تلوجو ..."
المفتش"شكون قالك نستنو ...الاولاد بداو يلوجو من اول مالقاو الكرهبة ...ارتاح يعيشك وخلينا نخدمو خدمتنا وعاونا بصبرك"
جاتها نزهة وجبدتها من قدامو وقت حست انو ممكن تزيد تغلط وتولي تهز وتسبط في الحديث "تولين يعيش بنتي ...اهدى وخلي نفهمو ساقينا من روسنا باش انجمو نلوجو عليها ...شي مايجي بالصياح "
جبدت ذراعها منها وهي تزيد تصيح اكثر " ماانجمش نهدى ...بنتي الله اعلم ويني وشنوة صاير فيها وانتوما تقولولي اهدى ؟!...بنتي مريضة...مرييييضة يا ناس ...اذا عاودلها كريز تموت ...يتقطع عليها الاكسجين وتموت ...هذا اذا ايلي خطفها ماقتلهاش بيدو ....حد كاينجم يفهم ايلي حاسة بيه انا ...حددد...لذا ...مانحبش نسمع منكم حتى كلمة لا تواسوني بيها ولا تسكتوني "
مسدت امها كتفها كي رات دموع بنتها هابطة سكابة "اشسش سبق الخير شنوة ها الفال .. "
كرهبة كحلاء حبست بعيد عليهم ...حكاية خمسين ميترو اكاكا وهبط منها عبد الجليل ...لقطتو تولين فيسع وهو يهبط منها ويحكي مع واحد من الاعوان من الظاهر يسأل فيه فماش جديد بخصوص بنتها...موش عارفة كيفاش سمع وكيفاش طلع بلاصتهم فم ...عينيها ايلي حبست على دموعها وقعدت مركزة معاه خلت نزهة اتبعها بخزراتها
وتشوفها وين مركزة ...للحظة تصورتو خيال ...وهم...مجرد سراب ...ما نجمتش تصدق ايلي راتو عينيها ...وساعت عينها على كبرها وهي تثبت فيه وفي ملامحو ...شعرو الشايب...وجهو ايلي خذات منو السنين ...مشيتو ...اكتافو....اعترفت انو تبدل بااارشا على صغرو....لكن رغم كل شي نجمت تعرفو من خزرة وحدة...قلبها بدا ينبض بقوة ...اذا ايلي صاير صدفة؟! والا عجلة الدنيا كملت دورتها ورجعت بيهم للصفر وخلتهم يتواجهو بعد ها السنين ؟!....شنوة يعمل فم وشنوة علاقتو بايلي صار لتولين ؟! ..تعبى مخها ببارشا اسئلة ونقاط استفهام ومع حالة بنتها والوضع دخلت في دوامة كبيرة معاها معادش حاسة بشي .
كان من الضروري يشوفها ...يحكي معاها ويصبرها ...يحاول ياقف معاها بايلي يقدر ..بالاخير هي مرت حد عزيز عليه ومن واجبو مايخليهاش وحدها في ظرف كي هكا ...كمل بتبت شوية على قضية سيلين وين وصلو فيها ومن بعد سأل العون علي تولين وين ينجم يلقاهت شاورلو العون ع البلاصة ايلي واقفة فيها ...دور راسو و خزر ...وبعدها ....بقات عينو زايغة ومعلقة ..
مانجمش بعدها يرمش ...ولا ياخو نفس ...اصلا من غير الممكن يخلي عينو تغمض ثانية وحدة ...كيفاش تغمض وهو يشوف في المرا ايلي عشقها وفنى في حبها ...كيفاش يفلت لحظة من الزمان وهي موجودة...ربما موش حقيقة ؟! ربما خلقها مخو وصورهالو ...وياما شافها قبل قدام عينو ...كاملة ومتكاملة ...لكن وقت يمدلها يدو تتبخر وتمشي ومايخلط على خطواتو المتعثرة وفتات قلبو المهشم...
هرولت ناحيتو تولين وهي تبكي ...رجتو من ذراعو "أركان وينو ؟!...علاش ماجاش معاك ؟! ..."
رمشت شوافره في جرة بعضها بتوتر وفاق من سرحتو وهو يمهمه " هو...هو...هاو...خالط ..."
تصرفاتو لازم تكون اكثر نضج من هكاكا... مالازمش حضورها يأثر فيه ...خزر لتولين ومسد كتفها بحنية " يعيش بنتي ماتخافش...ماتخممش ...سيلين باش ترجعلنا وبصحة عال العال ...و اركان كمل بحثو ...كلمني محاميه وقال ايلي مالقاو عليه شي سيبوه ...في اي لحظة ينجم يوصل "
هز عينيه فيلي مازالت واقفة وتخزرلو ....من غير الممكن تكون حلمة والا خيال ...هي حق وحقيقي قدامو ...لكن ...شنوة صيلتها بمرت اركان ؟!..خض قلبو وعصر عليه وقت عطاه عقلو فرضية ...تكونش ...امها ؟!
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Short Story★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
