🍇الحلقـــــ27ـة : القسـّـ4ــم🍇
💜✴✴💜
الدريسور كان خايف لا تعطلهم في الطريق وماتنجمش تدخل للغابة وتتحمل الوعر ...لكن تصدم وقت لقاها تزرب قبلهم وع العكس تحث فيهم باش يزربو ...وراهم بالضبط كانو خالطين عليهم عبد الجليل ونزهة ايلي ساعة ساعة تزلق لكن ذراعو تلقفها وترجعها واقفة ...
اركان...كان ..يجري بين الشجر وكل مرة ياقف يسمعش حثلة والا صوت ينجم يدلو على بلاصة سيلين ...مغامر بكل شي...وماعندو شي بين يديه ...اصلا موش متأكد انها مازالت موجودة فم...اما ع الاقل يلوج ويعمل كل ايلي يقدر عليه ...مع قربو شم ريحتو الكلب وبدى ينبح ويترس بين يد مولاه خزرتلو تولين بشك "زعمة ...لقاها...شم حاجة!؟ "
عقد الدريسور حواجبو ولوج بعينيه " موش هي ...فم واحد اخر هوني ..."
ڨمر صوت الكلب وجرى ناحيتو...هذا اكيد الجماعة ايلي وصاهم وصلو وبداو خدمتهم ...خض قلبها بين ضلوعها وهي تراه يظهر بين الشجر ..تقول من الخيال ...تمتمت باسمو وعرضتلو متلهفة "اركان....لقيتها؟! "
شاورلها براسو لا وهو ياخوها عندو و يطبطب على ظهرها "لا ...اما على قريب ..."خزر للدريسور " جوانب القنطرة الكل شفتهم ...برا نجربو لقدام "
تمسكت في ذراعو موش عارفة اذا خوف والا ثقة" خليه هو يمشي لجهة واحنا من جهة اخرى ...نربحو الوقت "
شاورلها براسو موافق ....عكسو الطريق هوما و صاحب الكلاب وكل واحد منهم شب في ثنية ...قعدو كان عبد الجليل ونزهة يدورو في روسها يمين ويسار موش فاهمين ...خزرتلو وهي تستنى فيه يقرر شنوة لازم يعملو وشكون يتبعو فيهم ...مسح وجهو بكفو وهو يمشي في ثنية مخالفة " احنا زادا خلينا نلوجو من هوني ...لعل نلقاو حاجة"
تبعتو من غير اعتراض وقلبها ماحبسش ع الدعاء باش تكون حفيدتها لاباس ...والا بالاحرى حفيدتو.
شدت تولين في يد اركان وكبست عليها صوابعها ...خايفة يخليها والا يتخلى على بنتها ...اذا عملها ...عندو حق وماتلوموش ...ماهوش مجبور ...سيلين موش بنتو ...وهي ماهيش مرتو...ولا نهار كانت قريبتلو ولا حتى بيناتهم مودة ...في الوقت ايلي احمد ...بوها ...قاعد يلوج في حد يحط فيه غشو ولومو ...هو يجري ويجري وناسي حتى روحو وجرح ساقو ايلي ينز بالدم...من الظاهر وهو يلوج تجرح والا ضربتو حاجة وتالمون مخو موش فوقو ماشلقش بيه ...حزت في قلبها الفازة ودڨة موجعة نخزت صدرها ...كبست بقوة على صوابعو تثبت يدو في يدها ....خزرلها موش فاهم ...خافت تضيعو وتفقدو وسط لحظات وجيعتها و محنتها ....خافت لا ماتلقاش فرصة اخرى معاه ... عنقتو وبقوة ...ماخلتش حتى مدخل للهواء بيناتهم ...بيبان صدرو تحلتلها ...وذراعاتو حاوطو بدنها...خلاها ترجع النفس وتاخو غرضها من الدفا ...اذا اختارتو هو كدواء ...فمستعد يعطي من روحو مايكفيها ويزيد....اذا اختارتو كتركينة تتخبى فيها ...فمستعد يبني من روحو بنيان وعرص ومايخلي حتى نسمة تحرك خصلة من شعرها ....
هزت راسها شافت عينيه ...تستنى فيها تقول مطلبها ...نجمت تقرى وعدو فيهم ...انو باش يعمل المستحيل وينفذو كيف ماتحب وتشتهى ...من بين ضباب دموعها اعترفت بداها " حاسة قلبي مشطور...حاسة بضلوعي محروقة ونارها شاعلة ...كل مفصل فيا تخدر معادش بعدو منجمة نتحرك...احساس ماكني ومخوفني ملي جاي ..."
خذى وجها بين كفوفو الكبار ومسح بسبابتو على خدودها "تولين...خوفك نحيه ...الحاجة ايلي كانت مخوفتك صارت ...توا انت مجبورة تواجه خسارتك...لا وجيعتك...ولا نارك....تنجم تكون سلاحك....خلينا نعملو ايلي نقدرو عليه ...نجربو الحلول الكل ....نمشو في اي طريق يعرضنا ...ومن الاكيد شنلقاوها "
وافقتو وهي تنشف خشمها و تضم شفايفها لبعضهم "خلينا نمشاو مالا ...خلينا نفلو الغابة كان لزم ورقة ورقة ...اذا توا والا بعد....باش نلقوها ...."
عاود شدلها يدها و هرولو مع بعضهم بخطوات متوازين طالعين الصعدة ايلي عارضتهم ...الوقت ايلي باش نضيعوه نبكو على فراق وخذلان حد...نكسبوه لجبران خواطرنا ...و حب الموقف الاول اعظم بارشا من حب النظرة الاولى.
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Kısa Hikaye★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
