💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

💐الحلقة 28 :"القسم 3"💐

💐الحلقــ28ــــة " القســ3ــم "💐
              ✴💚✴

عصر عليه قلبو وحس بضلوعو تكبس صدرو تضيق عليه النفس...سطرت عليه وجيعة ماعرفش منين ...لكن حس بقسوتها بدرجة كبيرة...وهي قاعدة لوطة تبكي وتناجي فيه ...خلاتو يحس قدامها انو حتى شي ...مجرد شخص اناني خمم كان في روحو وفي مشاعرو تجاه امها...كانت على طول تجري في حضوضو ...تحبو ...وين تلقاه تجريلو  وتلوج تعنيقتو ...اما هو فكان  على طول باب مسكر في وجها ...حس بالندم على كل ثانية فلتها وهي طالبة فيها قربو ...غمض عينيه بخيبة ومعاه تكسرت ضلوعو  وحس بيها توخزو كيف الشوك ...حاول يركز فيلي قاعد يتقال بين الزوز ايلي يشوف  فيهم  و نجم يفهم منهم انهم مبعوثين من حد اخر .

سيلين مانجمتش تسكت وخوفها كان مسيطر عليها وقعدت تبكي على امل ايلي اختارتو بوها يجيها ،الشي ايلي زاد طلع الدم ليلي موجودين ،واحد منهم مال فوقها و شدها من دبشها يرج فيها "سكت عليا حسك وغريدك ..."

كانت قد الطرف قدامو بمجرد ماحركها رعش بدنها الكل كيف الشجرة ايلي يهب عليه الريح ينفض عروشها ...شافو  يضرب بساقو ع الارض وهو يسيبها و يرجع لجنب الثاني  ،وقف قدامو وسألو من بين سنونو  "وتوا ؟!..هانا وحلنا ...توا هانا تحصرنا كيف الفيران ...شنوة باش نعملو ؟! "

حك الاخر راسو ينبش في فكرة تخلصو من هاك الوحلة "لازمنا نلقاو حل فيسع "

صاح صاحبو بعصب "فااازي ...هات ها الحل ...هاااات "

صوت صياحو زاد خوفها ...تكمشت اكثر على روحها وزادت في نواحها ،عاود صاح بقلة صبر "تي سكر فمك يا خرااا ..." دارلها  وهو ينبه عليها بصبعو كآخر تحذير " اسمعني نقلك ...اذا ماسكتش نخليك في ها الغابة للذيوبة والحلالف تاكلك  و ماتخلي فيك شي "

زمت شفايفها وكبستهم على بعضهم ودموعها هابطة  ...قعد بدنها يرعش وحدو ...لزمت على روحها تسكت وتبلع نواحها ...

رجع قدام صاحبو وكمل حديثو " كلمو ...كلمو قلو شنوة نعملو ...لازم يتصرف ويخرجنا من هوني قبل ما يطربق علينا المنداف  "

الاخر ماكانش موافقو ،هزو وحطو بشطر عين "هبلت ؟!..تلقاها البلاصة الكل مراقبة تاليفون واحد منا يكشف كل شي ويعجل نهايتنا يا بهيم  "

وقت شافها تبلع في شهقاتها من غير صوت وهي مسكرة فمها...خاف...لاول مرة يحس بهاك النوع من الخوف ...عندها مشكلة في  التنفس وفي اي لحظة ينجم يتسكر عليها الهواء....زحف اكثر وحب يظهرلها لعل يطمان قلبها كي تشوفو ...قعد يهز في راسو كل شوية باش تنجم تراه  ...من الاول  كانت مهبطة راسها لوطة موش معاه ...لكن وقت هزتو نجم يجلب انتباها باشارة من كفو  وسط لهوة الزوز الاخرين بحديثهم ...وساعت عينها وعلى شوية كانت نطقت باسمو وقامت ناحيتو تجري ...عمل على ذكاها وغامر وهو يشاورلها بصبعو باش تسكت ...وايلي بهتو ...انها طاوعتو. ...في العادة الناس ماتفهمهوش حتى لو فسر وعاود ووضح كلامو ...لكن هي فهمتو ...بمجرد اشارة ورغم عمرها الصغير...وكاينو ها الزوز بيناتهم رابط روحي مايستحقش انهم يفسرو تصرفاتهم .