💐الحلقــــ28ـة "القســ4ـم "💐
💚✴💚
تزاحمت دموع عينيه وهو يضغط صوابعها " سيلين ....بابا ....اسمعني مليح...اولا مالازمش تخاف لانو انت طفلة قوية بارشا تنجم تتحمل وتقاوم للاخير ..." شاورلها براسو لوين واقفين العباد ...وخير يوضحلها واحد منهم ويخليها تركز معاه " شفت هاك الراجل ايلي واقف ولابس الازرق......ايلي هاك المرة جاء لدار امك نزهة و عندو عينين كيف عينك ...تتفكرو؟! "
شاورتلو براسها ايه وهي ماهزتش عينيها من على وجهو " ...الراجل هاكي بوك .." هبطت دمعتو حارة " مانيش انا .."
مع دمعتو سالت دمعتها وكاينو النار حرقتها هي زادا " ...انت توا باش تقعد هوني تستناه حتاش لين يجي ويخرجك من الكرهبة ...... هو والبقية باش يعاونوك تهبط وترجع لماماتك ..."ضغط اكثر على صوابعها " لازم ماتخافش وانت تستنى فيهم ...لازم ماتبكيش..." بلع ريقو وكمل " تعرف شباش تعمل توا!! ...باش تحط يدك على عينيك وتغمضهم وتكبس عليهم ،رد بالك تحلهم لانو هوما وقتها يبطلو معادش يجو ...وانا نتغشش بارشا ...مهما سمعت ومهما حسيت رد بالك تحلهم ...باهي "
شاورتلو براسها "باهي "
مد يدو لخدها تلمسها ...سبحانو ايلي خلى هاك اللمسة ترجعلو ذكرياتو معاها ، لحظات محبة مدفونة ومقيدة ..رغم انها بنت الراجل ايلي كان حاجز بينو وبين المرا ايلي يحبها ..الا انو اكتشف حقيقة اخرى ...هو يحب ها البنية الصغيرة ..لدرجة انو ينجم يفديها بروحو... فيقتو من سرحتو وقت سألتو " وانت بااا...باش تغمض عينك كيفي؟! "
غمض عينو باش يمنع دمعتو ..."باااا"...ها الكلمة لا طالما كرها... ليوم احلى على قلبو من العسل ...قلع يدو تقليع منها ،مسدلها شعرها بحنية وبعد نحى مريولو وكبسلها بيها عينها ...ترجت بيهم الكرهبة خلاتو يميل لقدام شوية ...شد روحو باش يكمل يكبسو مليح باش ماتنحيهوش بسهولة...
كيف كمل عاود كبس على راسها بين كفوفو وخلى دموعو تهبط ...خليها تهبط مادام عينيا مغمضة و ماتنجمش تشوف ضعفو ....خذى نفس طويل من ريحتها ووشوشلها في وذنها ..."توا ....لازم تخلي عينك مغمضة ...وتستنى بوك لين يجيك...رد بالك تحلهم....."
لبدت في بلاصتها رغم ايلي موش فاهمة ها الفلسفة ايلي قالهاها ، بعدلها يدياتها الصغار ايلي شدو في ذراعاتو تقول حاسة بيه باش يخليها ...عاود وصاها واكد عليها " رد بالك تنحي ايلي على عينك ....مهمها يصير ومهما سمعت ومهما حسيت "
قعدت لابدة بخوف كيف ما طلب منها وقلبها الصغير باش يطيح من بلاصتو ....تحلحز اركان شوية ناحية الباب ودزو بساقيه ..الصوت خلاه يتلفتلها لعل حلت عينها ...لكن الطفلة قعدت على حالها ..خزر للوطىة وين الناس الكل ملمومة ...يدعو باللطف ماتزيدش الكرهبة تميل لقدام ...لكن عينو مامشات كان لتولين...حالتها كانت صعيبة ...تقطع القلب ...كانت كيف تتوجع تسكت ...كيف تبكي تمسح دموعها فيسع وتداريها عليه ...كيف تخاف الخسارة تقاوم وماتوريهوش ...لكن وقتها كانت اضعف مخاليق ربي ..كانت تخزر لفوق ...ليهم مستنية يوصلولهم قبل ما يفوت الفوت ...تحل الباب بين هواء وفضاء ومالت الكرهبة على جنب ...صاحوا ايلي لوطة و عيطوا باش الاخرين يزربو رواحهم ...وحدها هي قعدت ساكتة ومتبعة اركان...وكايني قلبها خبرها ايلي باش يعملو ...كانت لحظة ماتتعاودش ماتتمحاش من بال اي واحد حاضر فم...كيف شافو اركان يرمي روحو من الكرهبة من غير ما يخمم في الحجر ايلي تحتو باش الرزن يخف ...وساعت عينها وتجمدت ساقيها
.... وقفت الدنيا فم عندها ....رجعت الكرهبة ومالت لتالي ...خرجت ع الحديد وبعدت شوية ع الحافة وقت نقص الوزن ايلي كان من قدام ...
كانت قالتلو الجرح ينجم يخفف الوجيعة ....ها المرة الوجيعة كانت اقوى واقوى شدت في كل عضو من بدنو ...حس بعظامو تتفتفت واطرافو تتشل ...مانجمش يحركهم ولا يحرك راسو حتى ،كل ايلي نجم يعملو هو انو يخزر للسماء ...واكتشف وقتها انها مغيمة ...الغيم كان يتحرك معناها فمة ريح ...علاش موش حاسس بيه ...صوت مخلط بين رجال ونساء ...كل شي داخل بعضو ...قفاه تقول شاعلة فيه النار ...حاسس بمسمار يدق في ظهرو...مازال حاسس بسخانة الدم الخارج منو ...ومازال الغيم يتحرك...لقى روحو يستنى في الشمس تبان ...غريبة !؟ موش هكا ؟!...وقت هو يقاوم في الموت ...غريبة منو يخمم في الشمس والغيم من دون المشاغل الكل ...
صاااحت تولين لين ستخايلوها باش تبح والا تتقطع حبال صوتها ، جرات من غير ماتشعر ...حاولو يمنعوها ويوقفوها موش ناقصين مصيبة اخرى يتلهاو فيها ...لكن قوتها كانت عجيبة ...نجمت تدزهم بعيد وتكمل ...زلقت وقت جات ساقها فوق حجرة رطبة ...لكنها وقفت رغم البلل والطين ايلي عبى روبتها وكملت طريقها لين وصلت للحجر ...ترمات بجنبو على ركايبها ...الشمس في هاك الوقت بعد عليها الغيم ...وبان ضوها ...تبسم في وقت موش مناسب لتبسيمتو ...مدت يدها باش تمسو لكن ...سمعت جماعة الاسعاف وراها "ماتمسوش ...ماتحركوووش"
حبست يدها بالوقت وخلتها معلقة في الهواء...كان يخزر للشمس موش ليها ....لكن شام ريحتها ..سبلات شعرها ايلي هازهم الريح مع ضوء الشمس ...رسملو مشهد مزيان..ياما حاول يصورو وقت يعمل في اشهار لبرفاناتو ...علاش مخو هكا يخمم...علاش ما يقلهاش نحبك ...والا يودعها كيف ما يورو في نهاية الافلام والكتب ...علاش يخمم في الشمس و البرفان ...بدات عينو تترخف وترزن ...موش منجم يقاوم باش يحلها ...بدات تتسكر بالشوية ...لكن دمعة تولين هبطت عليه خلاتها تتحل من اول وجديد ، وساعت على كبرها وكاينو فاق وقتها ، اخيرا خزرلها ....كانت مزيانة ...عظيمة ...متجبرة ...كيف ما راها اول مرة ...لكنها تبكي ...تبكي حتى وهو ماضربهاش ...ماهانهاش ...ماخوفهاش.....هو اصلا ضحى بحياتو باش معادش تبكي ...باش ترتاح منو ...اذا بقى عايش فمستحيل تفرح وتجمع عايلتها ...طالما هو يتنفس فانانية حبو تغلب ...مرضو يغلب ...عنفو....سيطرتو ...ساديتو تغلب ...ومستحيل في حياتو يخليها ترجع ليلي تحبو ولبو بنتها ...الحل ...هو الموت ...تبسم وغمض عينو ...مبروك عليك الحرية تولين .
💔نهاية الحلقة 28 💔
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Short Story★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
