Amiss Prayer (Zawgyi&Unicode) [Completed]

Part-60 (သာယာသောအဆုံးသတ်)

For Unicode
သာယာသောအဆုံးသတ်

ခိုင်မာသောဆုံးဖြတ်ချက်တို့နှင့် သဉ္ဇာထက်၏လုပ်ဆောင်ချက်တို့သည် မှန်ကန်သောနည်းလမ်းများသာဖြစ်သည်။

အိမ်တွင်လည်း ကိုတေဇတစ်ယောက် အကျယ်ချုပ်ကျနေလေပြီ။ ဖေဖေနှင့်မေမေသည်လည်း ကိုတေဇအား အိမ်ထောင်ချပေးရန်နှင့် နိုင်ငံခြားသို့စေလွှတ်ရန် မြန်မြန်ဆန်ဆန်လုပ်ဆောင်လေပြီ။ မိမိသည်လည်း သူရိန်တို့အား ကူညီရန် အဆင်သင့်‌ဖြစ်နေလေပြီ။ အတ္တကြီး၍ မိုက်ကန်းလှသော ကိုတေဇ၏ရွေးချယ်မှုတို့အား နည်းနည်းမျှသဘောမကျ။ မိမိသည်လည်း သူရိန့်အားချစ်သည်ဟုဆို‌သော်ငြား မိုက်ကန်းလွန်းခြင်းမရှိ။ အဆိပ်ပင် ရေမလောင်တတ်။ ထို့ကြောင့်သာ ဤသို့ဆုံးဖြတ်လေသည်။

ကျွန်မရွေးချယ်မှုတွေ မှန်ကန်တယ်မဟုတ်လား။ ကိုယ်သာ စိတ်ဆင်းရဲရပေမဲ့ သူတို့ပျော်နေမှာပဲလေ။ အတိတ်ဘဝက သူများချစ်ခြင်းကိုခွဲခဲ့မိလို့ ဒီဘဝမှာလည်း ကိုယ်ချစ်ရတဲ့သူနဲ့ ကွေကွင်းရတယ်လို့ သတ်မှတ်လိုက်မယ်။ အခုဒီဘဝမှာ သူတို့ကိုချစ်ခြင်းကိုကူညီခဲ့လို့ နောင်ဘဝမှာများ ချစ်ရသူနဲ့ ပေါင်းရလိုပေါင်းရငြားပေါ့။

ထိုသို့သောစေတနာမျှော်လင့်ချက်နှင့်အတူ သဉ္ဇာထက်သည် နေသူရိန်အား အင်းလျားကန်‌တွင် မနက်ဖြန်ညနေလေးနာရီ၌ တွေ့ဆုံရန် messageပို့ထားလိုက်သည်။ ဖြစ်တည်လာမည့် မနက်ဖြန်ကိုသာ အကောင်းဆုံးဖြတ်သန်းရန် သဉ္ဇာထက်တစ်ယောက် အားခဲလေသည်။

ထိုတစ်နေ့တာကျော်လွန်ပြီးသောအခါ နေသူရိန်နှင့်လမင်းကိုကိုသည် သဉ္ဇာထက်ချိန်းဆိုရာနေရာသို့ ရောက်နှင့်လေပြီ။ ခေတ္တမျှကြာသောအခါ သဉ္ဇာထက်သည်လည်း ရောက်လာခဲ့သည်။

“ ငါနောက်ကျသွားလားသူရိန်.. စောင့်နေရတာကြာပြီလား လမင်းကိုကို.. အားနာလိုက်တာ “

“ နောက်မကျပါဘူး ငါတို့က စောရောက်နေတာပါ “

သဉ္ဇာထက်၏အမေးအားလျှင်မြန်စွာပြန်ဖြေသူသည် နေသူရိန်ပင်။ ခေတ္တမျှ အံ့ဩနေသူက လမင်းကိုကိုပင်။

ဟုတ်ပါသည်.. အံ့ဩမိသည်။ ယခုတွင် မိမိအားနှုတ်ဆက်လာသည့် ဇာဇာသည်.. ယခင်က မိမိတွေ့ခဲ့ဖူးသော ဇာဇာမဟုတ်တော့ပေ..။ သာယာချိုမြိန်စွာပြုံးလျက် နာကြည်းချက်တို့ မရှိတော့သည့်နှယ်..။ ဖြူစင်လှသည်။