💐صـــيــدُ آرتِــــمـــيــس 💐(كرونيك باللهجة التونسية: مكتملة )

الفصل الثاني ....." موعد مدبر "

             💚✴✴💚

وكاينو مفاصلها الكل بعدت على بعضها ...ساقيها وبقية اطرافها يا دوبك حاسة بيهم ...عطش عظيم شيح ڨراجمها ومعاه مانجمتش تنطق بحرف واحد ...قعدو يخزرولها الزوز مستغربين في وجها الشاحب ورعشة شفايفها ...قدام بهتتهم  لزمت على روحها تتصنع تبسيمة باينة صفراء ومتاع تتليف ...في راسها يدور سؤال واحد ....يا اسماء....كيفاش باش تسلكها توا ؟!!!....حكت قفاها وبهاك الحركة تفكرت انها من راسها لساقها مغبرة وحالتها اقرب لتمثال مطيش من سنين ...الحل ايلي لقاتو هي تتسوخف ...تحسست ركبتها وعملت روحها تتوجع ...خزرلها سليم من فوق للوطة بريبة ...جانب منو خاف لا تكون ساقها تجرحت ...وجانب كبير اخر ماصدقش ...بالاخير مافمة لا حجر ولا حاجة يابسة في البلاصة ايلي تبلطت فيها و  تنجم تضرها... كلو تراب صافي اكثر حاجة ينجم يسبب فيها شوية غبرة  ...قعد واقف ماعمل شي ...اما رؤوف  فجدت عليه كذبتها ،قربلها و سألها   " لاباس؟! "

رمشت شوافرها في جرة بعضها بتوتر وخزرت من تحتهم لسليم ايلي قدام هاك العين التايهة مالقى بيها كان ينفخ بقوة ويمدلها يدو  باش تشد فيها وتخرج من وسط هاك التراب ...بينها وبين جنس ادم  حطت حاجز وحلفت من نهارها لا تعطي حتى فرصة لحتى واحد يعاونها ولا يعمل عليها مزية ...خزرت بعيد  هاربة ونفضت شعرها الطويل وراها ...خلت خصلاتو كيف الموج يسرحو مع الهواء...شهقت برعب وقت حست بزوز ذراعات كيف الحديد تكبس على اكتافها وتهزها بين هواء وفضاء وتخرجها من وسط التراب...قوة ذراعاتو  ايلي كانت جبارة خلت ريحة رجوليتو تفوح من كل انش منو ...لقات روحها لا اراديا تشد فيه بخوف وبفجعة ...خزرت لعينيه من قريب ونجمت تشوف فيهم  بحر  عسلي صافي مافيه حتى شايبة تشوبو ...مافاقت من ضياعها كان وقت تمايل بدنها يمين ويسار بعد ما جبد ذراعاتو منها وخلاها ع الشايح

" اذا ناوية تعطلنا هكا  في كل مرة تخطف فيها تصويرة ...ننصحك ...تخلي ها البلاصة ليلي يملاها و يعرف قيمتها ..." نفض كفوفو من الغبرة ايلي لصقت فيه من دبشها    وقبل ما يمشي  زادها كليمات شعل نارها " حاجتنا زادا بناس متواضعة وسوسيابل ...موش  معقدة كيفك "

وساعت عينها وتغضن جبينها بتنرفيز كبير ...بالسيف شدت لسانها ...تمنت من كل قلبها تعطيه مصروفو وتجاوبو على كل كلمة تفرغ  قلبها فيه وفي كل راجل يرى روحو سيد زمانو ...اما هي مستحقتو ...مستحقة علاقة معاه تكون بعيدة ع الكره والنبزيات ...ع الاقل في الوقت الحالي ...لانو زيوس...هو الصنارة ايلي باش تجيب حوتتها ليديها ...وهي بعد تتصرف في تقشيرها وتقطيعها على كيفها ...

خلط عليه رؤوف وهو كل مرة يتلفت وراه يشوف فيها مازالت واقفة على بلاصتها " سليم ...شفت شعرها ؟!...ماشاء الله يفكرني في الحوريات  ..."شد في ذراعو وكمل يمشي "  في الاغريق ماو عندهم الحوريات موش هكا ...يظهرلي كل الهة كانت عندها مجموعة من الحوريات  تحت يديها ...صح ؟! "