" بارك الله لكما وبارك عليكما وجمع بينكما في خير "
إحنا خلاص إتجوزنا ! بقيت مراته رسمي ! قدام ربنا وقدام كل الناس ، أنا بحلم صح !!
المأذون مشي ، ماما مشت ، الناس كلهم مشوا ، باقي أنا وهو بس ! إحنا الإتنين بس ، أروح أقتله وأقول كان بيحاول يتحرش بيا ؟!
قربت منه ـ إحنا إتجوزنا وده شيء يُحترم !
- آه
- وأنت بقيت زوجي قرة عيني ، وده شيء يُحترم برضو
- كويس
- بس أنا مش هاحترمه
- عظيم
شاروت ع السرير ـ أنا هانام علي السرير وإنت هتنام ع الكنبة دي
- وليه متناميش إنتِ علي الكنبة وأنام أنا ع السرير !!
- إنت عبيط ياسطا ! أنا أتجوزك وأنام ع الكنبة كمان ؟!
- تكفير ذنوب بقا هانعمل إيه !
- أبو تقل دم أمك ياخي
مسك إيدي ـ هاتغلطي هازعلك !
- إلعب بعيد يلا
ساب إيدي وراح نام ع السرير ، إنسان برأس بخاخة ، فاكر إني ممكن أحبه ، ده بعينه والله ، يوسف ! ولا يا يوسف !
- هاننام النهاردة ولا إيه !
- ماتنام ، أنا مال أمي بيك ؟!
- يا صبر أيوب ، خلاص متناديش عليا يا بتاعة لو أنت آخر واحد ف الدنيا مش هاتجوزك !
- أنا بتاعة يا يوسف ! طب طلقني
أنا قولت فعلًا لو هو آخر واحد ف الدنيا مش هاتجوزه ، بس قضي الأمر وإتجوزته ، نعمل إيه يعني ! نعارض أمر ربنا ؟! أما الإنسان ده غريب جدًا.
- صباح الخير
- صباح الزفت ع دماغك
قرب مني وقال ـ هاتلمي لسانك وتتلمي ولا ألمك أنا !
- إيدي وجعتني يا حيوان
ضغط ع إيدي ـ فاطمةة !
- أوامرك يا سي يوسف ؟!
هو الإنسان كده مبيجيش غير بالضرب ع دماغه ، وهو حيوان ما بيصدق أغلط فيه ، سأخبر الله بكل شيء.
- فاطمة !
- حاسة إني هاتهان دلوقتي سيكا
- أنا مش بنادي عليكي ؟
- عايش إيه !
- إعمليلي قهوة
- لأ مش بقولك عايز إيه ، بقول إنت عايش ليه ؟!
- عشان أقرف فيكي حلو كده ! إعمليلي قهوة بقا
- حاسة إني الخدامة الفلبينية بتاعته سيكا.
عملت القهوة ووقفت قدامه ـ بتعمل إيه كل ده ع الموبايل ! بتخوني صح !
- بس يا بتاعة إنتِ
- أنا بتاعة يا يوسف !
بصلي ـ إقعدي يا فاطمة جمبي !
- هاتضربني صح ؟!
ضحك ـ إقعدي يا طفلة إقعدي.
ضحكته حلوة أوي ، تقريبًا دي أول مرة أشوفه بيضحك ، طول الوقت مكشر ومركز ف الشغل ، بس منكرش إن بالرغم من كده كان عاجبني ، مش هانكر إني شخصيته عاجبني ، مش هانكر إني حاليًا نفسي أحضنه !
- تعرف أن ضحكتك حلوة أوي !
- ورأفة بالناس مبضحكش كتير
- تعرف إني ب...
- إيه !
- مفيش أنا بس عايزة أنام
صحيت تاني يوم وأنا ف حضنه ، مش عارفة نمت كده إزاي ! بس تقريبًا كنت مرتاحة ، كنت حاسة إني مش لوحدي لأول مرة !
- هاتتأخر ف الشغل
بصلي بإهتمام ـ إدعيلي
- بدعيلك
حاسة إني بقع فيه بالبطيء ، هو غريب ، غريب جدًا ، غريب لدرجة إني مش عارفة المفروض أحبه ولا أعشقه ؟!
