Oya o, your favorite Aunty don come. Aunty Amebo don land to gist una today about one serious matter.
Make I start by asking una one question? You dey proud of your culture?
Aunty Amebo dey very proud of our culture na em make I say make I gist una this serious story.
Time to shine light on our culture don reach.
For us way be writers, our pen or keyboard na em be our sword. We suppose use am open way for African stories. We dey complain say the world no dey give Africans chance, say them dey treat us like say we be dolo. But we Africans, we dey give ourselves chance so? Make I explain...
If you look everywhere for Wattpad, you go see say plenty of the stories na oyinbo story. E no mean say e bad o; e just mean say time don reach for us to diversify the whole thing. Make we show people story way come from our side. Make we show our plenty-plenty better African narrative.
If you like to dey write only oyinbo story, no be problem. But all of us way wan showcase our culture, time to shine don reach. Just dey write better burst-my-brain stories. One day you go see say your work no dey in vain because better thing get how e dey shine.
Now Aunty Amebo wan go rest; make I think of wetin we go talk for my next article. If you get questions you want make I answer, I dey gidigbam. Ask, my ear dey open.
