💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

🎆الحلقة 29 : القسم 1🎆

💐الحلقــ29ــة "القســ1ـــم 💐

الرزن كي خف ع الكرهبة،خلى ضغطها ع الحديد يقل ومعاه كبر الامل باش تبقى سيلين عايشة وتمنع من موت محقق ، الوقت ايلي سرقو اركان من حياتو وعطاهولها مامشاش خسارة  ، اخيرا نجمو يوصلولها ويخرجوها منها ، كان جبينها ينز بالدم نفخ المريول ايلي مغمض عينيها وايلي اول مالقفوها نحوهولها باش يخلوها تشوف وين هي بالضبط ويقللو من خوفها  ،خزرت للوجوه بضياع و برعب  وكاينها كانت تلوج بيناتهم على اركان ، دمعت عينها وتمتمت باسمو وقت مالقاتوش " باااااا"

جرالها عبد الجليل  ولقفها من يديهم  ،لزها لصدرو ومسح شعرها بحنية لعل  بهاك الحركة يطمنها ويخليها تنسى شوية الرعب ايلي عاشتو  ،هبط بيها  يزرب لوطة وين كانت الاسعاف مازالت كيف وصلت ...زوز كراهب وزوز سطافات جاو خصيصا لفم  ...وحدة ليها هي والثانية لأركان ...في هذا الكل ...تولين كانت واقفة في الوسط  تايهة ...تخزر بعين ميت ليلي يتجراو منا ومن غادي ...حتى بنتها ايلي نبشت الارض بظوافرها على جالها ... نساتها ...كانت بلا روح تقريبا  ...على يمينها كان اركان  وعلى يسارها كانت سيلين ...بين نارين واقفة وبيناتهم الزوز كانت عاجزة ...استغل احمد الفرصة  ...وهرول ناحية عبد الجليل  قبل مايوصلولو المسعفين ...خطف من يديه سيلين بعنطزة ...بنتو وهو الوحيد ايلي لازم يتلهى بيها ، ثبت في جبينها المحلول  واستغرب انها ماهيش تبكي كيف اي صغير طبيعي  ، كبس عليها عندو بقوة  "تخافش يا بابا ...تخافش ...جرح مايخوفش "

وهي بين احضانو ...رجف قلبو ...حس باحساس دافي يغرق داخلو ...اول مرة يطعم الابوة منها ...بعمرو لا كان قريب منها هكاكا ولا نجم يعنقها عندو ...لاول مرة يحس بروحو فرحان ...تأكد وقتها انو لو تطبقت السماء ع الارض فهو يستحيل يخليها لراجل غيرو يربيها ...هي منو وقطعة من روحو ،باش يعمل المستحيل ويفكها منهم وياخو حقو ايلي سلبتهولو تولين طول ها السنين ..

لكن ...سيلين كانت عندها راي اخر ...هي اختارت بوها من زمان ...وموش مستنية بو جديد ولا عندها بلاصة في قلبو ليه...رغم ايلي اخر كلام اركان كان واضح ...لكن عقلها مااستوعبش هاك الحقيقة ...بو واحد تعرفو ...حتى لو نعتها على عشرة غيرو ...هو بوها ومستحيل تختار حد اخر ...

وهي بين ذراعاتو في طريقهم للاسعاف ...نجمت تشوف اركان الممدود ع البلونكار والمسعفين هازينو ...كان مغمض عينو ...بدنو الكل  مربط بالسبت و مضمد ...تململت بين يدين احمد حابة  يهبطها ...خزرلها موش فاهم بحكم ماعندوش خبرة مع الصغار  "شبيك يا بابا "

ضربت صدرو بكفوفها الصغرونين وتذبيلة عينيها الحزينة ذبحتو  "سيبني "

باس خدها لعل تهدى "لا بنوتي نحن لازم نمشو للطبيب "

ضربت صدرو وبكات باحتجاج  " سيبني "
هبطها على ساقيها  مجبور ياخو بخاطرها وهي دوب مامست الارض فلتت منو وجرات لاركان كيف النسمة ناسية جرحها  ...حس بقلبو تكسر لالف قطعة وهي تتخلى عليه  ...شنوة ايلي عملو في حياتو باش بنتو  تشوف حد اخر بوها؟! ...شنوة الذنب ايلي يتحاسب بيه  باش يتحرم من لذة ابوتها وغيرو يتلذذ بيها ؟! ...عكش على بلاصتو  وهو يشوف فيها تجري بكل جهدها رغم حفى ساقيها ...نطقت بكلمة بابا اكثر من مرة تناجي في اركان ايلي في عالم اخر  ...تزرفت من بين الساقين وجبدت يدو الباردة ...ببراءة صغير متخيل الدنيا ساهلة رجتو "بااااا...انا ماخفتش ...باااا .."

خطفتها نزهة فيسع و خبتلها راسها عندها باش ماتشوفش اركان وهو في هاك الحالة ...اما تولين ...فكلمات بنتها كانو كيف حكم الاعدام على محكوم مظلوم ...حست بالدنيا تظلام قدامها وبدنها معادش حاسة بيه ...اصوات بارشا تزن في وذنها ...شوية شوية تشوشت ومعادش منجمة تفهم فاش يحكو ...رزنت شوافرها ، خانها بدنها وخانتها قوتها ...طاحت دايخة ...لكن يدين عبد الجليل لقفتها فيسع وهو ينادي باسمها بلهفة وبرعب .