💕أنت قلبي٢💕

الحلقة ٨٦

#انت_قلبي٢
#بوسي_مصطفى
_______________
الحلقة ٨٦

فريدة : قسمت مجدي مين؟
الاسم دا مش غريب عليه.
آدم : ما هو يا خالتو هي تبقى
بنت صاحبتك.
فريدة : انت تقصد قسمت بنت داليا صاحبتي انا؟
آدم : هو في مشكلة ؟
فريدة ببتسامة : لا يا حبيبي بس كانت مفاجأة بالنسبالي يعني شوفتها امتى و لحقت تحبها
يعني معقوله دا حب من أول نظرة زي ما بيقولوا اصل أنا مفتكرش إنك شوفتها عندي
و اصلا داليا مبتجيش و معاها
...........
{و بعدها افتكرت فريدة} ..
ايوه.. ايوه داليا كانت جات عندي و معاها البنات و يومها أنت كنت هنا برضه بس أنا فاكره إنك فتحت ليهم الباب و خرجت على طول.. معقوله !!
آدم ببتسامة : لا يا خالتو ما هي قسمت زميلتي في الجامعه و كنت شوفتها كام مرة كده و كان كلهم خناقات يعني ما عدا المرة اللي شوفتها هنا و في عيادة دكتور الأسنان.
فريدة : هههههههههههه
لا استنى بقى علشان الظاهر الموضوع كبير و محتاج كوبيتين شاي و كيك
الشاي طبعا ليه و الكيك ليك علشان اللي ميتسماش اللي اسمه الدايت ده.
آدم ببتسامة : بس أنا مش عايز اتعب حضرتك.
فريدة : لا اتعبني زي ما انت عايز دا انا الفرحه مش سيعاني النهاردة
كنت الأول فرحانه إنك جاي تقعد معايا دلوقت و بعد ما عرفت الخبر الجميل دا نفسي ازغرط بس للاسف مبعرفش.
ههههههههههههه

آدم و قرب من فريدة و هي واقفه في المطبخ.
آدم : يعني حضرتك هتساعديني؟
فريدة : اساعدك و بس!
دا انا هاخدك من ايدك و اروح اخطبهالك.
آدم ببتسامة : متشكر اوي يا خالتو.
فريدة : على ايه بس يا حبيبي؟
بس قولي بقى كل حاجه بالتفصيل عرفتها ازاي و امتى حبيتها و متأكد إنها بتحبك و لا لأ؟
بس علشان ابقى عندي فكره بالموضوع.
آدم : هقول لحضرتك كل حاجه بس حوار إنها بتحبني و لا لأ دا لسه معرفوش بصراحه.
فريدة : لا سيب الحوار دا عليه المهم تكون انت متأكد إنها بتحبك اما هي بقى انا ليه طريقتي اللي هعرف بيها كل حاجه.
آدم : الحكاية ابتدت........
__________

في شقة مجدي...
قسمت بغضب تحدف الموبايل.
رقيه : ايه يا مجنونه اللي بتعمليه دا الفون يتكسر.
قسمت : رقيه انا في مصيبه.
رقيه : نعم!!!
انتِ بتقولي ايه؟!
قسمت : دلوقت آدم نزل صور ليه على صفحته.
رقيه : تمام... و بعدين.
قسمت : سرحت شوية كده و أنا في أيدي الفون لاقيتني دوست لايك من غير ما احس.
رقيه : اممم و انتِ تدخلي صفحته ليه من الأول؟؟
مش قولتلك بطلي بقى اللى بتعمليه ده؟!
قسمت : اللي حصل بقى
قوليلي دلوقت اعمل ايه؟
رقيه : اعملي بلوك..
قسمت : نعم!!
رقيه : ما هو حتى لو شيلتي اللايك ده هيظهر عنده في الإشعارات إنك عامله لايك و حضرتك اسمك و صورتك منورين البروفايل و هيعرف حضرتك مين و كون انك مش عنده في الفريندز فهيبقى موقفك زباله الصراحه
و بعدين أنا مليون مرة قولتلك بلاش تنزلي صورك هنا على الفيس مبتسمعيش الكلام.
إنتصار : مين دي اللي بتنزل صورها على البتاع اللي اسمه الفيس دا يا بنت يا رقيه؟
قسمت : شوفتي هتجيبلنا الكلام اهو.
إنتصار : ما تردي انتِ و هي و لا خلاص مش قادرين تتكلموا؟
قسمت : أنا يا تيته حاطه صورتي على البروفايل بتاعي.
إنتصار : يطلع ايه اللي قالت عليه اختك دا يا رقيه؟
رقيه : دا معناه الصفحة الشخصية يا تيته.
إنتصار : مش فاهمه منكم حاجه
انتِ يا بنت يا قسمت بتنشري صورك على النت؟!
قسمت : لا يا تيته بنشر صوري ايه؟!
دي صورة الصفحة الشخصية بتاعتي.
إنتصار : و دي مبيشوفهاش حد؟
قسمت : لا طبعاً بيشوفها كتير بس على صفحتي يعني
مش عند حد تاني.
إنتصار : و دي مش ممكن حد ياخدها و يعمل بيها حاجه؟
قسمت : لأ انا عامله لـ الصورة حماية يا تيته.
إنتصار : تطلع ايه الحماية دي؟
قسمت : يعني محدش يقدر ياخدها عنده يا تيته.
إنتصار : وريني الصورة دي.
قسمت : اتفضلي.
إنتصار : حلوة.. و زي القمر كمان.
قسمت ببتسامة : حبيبتي يا صاصا متشكره اوي.
إنتصار : بس شليها احسن.
قسمت : ليه بقى؟
إنتصار : مش انتِ زي القمر في الصورة دي؟
قسمت ببتسامة : حضرتك اللي شايفه كده.
إنتصار : طيب يعني الصورة دي بيشوفها شباب مش كده؟
قسمت : اكيد.
إنتصار : و فتنتي كام واحد بيها لحد دلوقت؟
رقيه : فتنة ايه بس يا تيته؟!
إنتصار : ايه مالك مستغربه ليه من السؤال.
هو أنا لما احط صورتي و أفرج عليها خلق الله
هقول لـ دا كمان غض بصرك يا ولا متبصش عليه و تقعد متنح قدام صورتي؟!
قسمت : لأ ما هو الذنب عليه بقى مش عليه انا.
إنتصار : ازاي يعني الذنب عليه لوحده ما انتِ مشاركة في ده
شيلي يا بنتي صورتك متشيليش نفسك ذنوب علشان تفرحي بنفسك و دا يكتبلك كلمة حلوة و صاحبتك تقولك جميلة
و بتاع
ما أنا عارفه شغل البنات ده
خلي جمالك لنفسك و لـ الراجل اللي هتبقى من نصيبه مش عرض و صورة لـ كل من هب و دب يقعد  يملي عينه منك
خلي عندك غيره على نفسك.
رقيه : على فكرة يا تيته شابوه جداً لحضرتك بجد..
إنتصار : يطلع ايه الشابوه دا كمان؟!
اوعي تكون شتيمه؟!
رقيه ' لا يا صاصا و أنا أقدر برضه دا انا بقول تصفيق حار لحضرتك.. و ارفعلك القبعه كمان 👏👏
إنتصار : هههههههههههه
قبعة! و هي فين القبعة دي يا بنت يا رقيه.
رقيه : اعتبريها موجوده يا تيته
ههههههههههههه
قسمت تهمس لـ رقيه : ايوه اقعدي سقفي انتِ و سبيني
في الكارثه اللي انا فيها.
رقيه : بقولك اعمليله بلوك.
قسمت : قلبي مش مطاوعني.
رقيه :  لازم يطاوعك.. اقولك خليه يومين بس و بعدين ابقى فُكي البلوك عادي.
قسمت : طيب.
رقيه : مالك زعلانه اوي كده.
قسمت : ما هو يومين كتير يا رقيه.
رقيه : خلاص متعمليش حاجه و خليه يعرف انك بتراقبيه.
قسمت : انا!!
دا بروفايله بيجي معايا كده.
رقيه : يا سلام!!
بطلي كذب بقى.
قسمت : لا مبكذبش اصل لما عملت سيرش في الأول فضل الاكونت عندي و كل شوية بدخل يعني انا دلوقت مبدورش على الاكونت بتاعته.
رقيه : يا سلام!!
و كده بقى مبتدوريش؟!!
__________________