⚜️✨ الأسيرة و المتدين ✨⚜️
🔸 بقلم : ليلوشة 🔸
🔅حصريا على كرونيكات اوبال🔅
〰️〰️〰️〰️〰️〰️〰️〰️〰️〰️〰️
|| الحلقة 33 ||
المجهول : متخافيش مدام راح تحطي يدك فيدي مراح يقدر يعملك شي ..
تمالكت اعصابها .. و خذات نفس عميق و رجعت هدرت ..
لينة : و مهمتي وشنو هي ..
المجهول : حلي وذنك مليح و اسمعيني .. راح يحاول يخرجو مدار .. راح يجيب سبة و يخرجو معاه .. معلاباليش كيفاش راح يدير و وقتاش و وشنو خطتو .. يعني لي عليك هو انك غير تسمعي راهو مخرج حكيم ما عليك غير تعيطيلي فهاد التيليفون و راح نقوم بالواجب ..
لينة : اوكي .. اما كيفاش تثبت انو لي حكاه عليا ماشي صح ..
المجهول : عندي فيديوهات ليكم فالجاردان و السبيطار يعني كلش راهو واجد .. غير تم المهمة راح يتكشف كلش ..
لينة : اوكي راح نعمل جهدي باش نعرف ..
المجهول : بالتوفيق ..
و قص عليها لابال .. نحات تيليفون من وذنها .. قدمت لطابلة حطاتو فوقها .. قعدت فوق الكرسي .. فرغت كاس ما و شرباتو .. يديها يرعشو .. قلبها قاعد يخبط بسرعة لدرجة انو حركة دمها قاعدة تحس بيها فشريينها ..
كيفاش كانت حالتها و كيفاش ولات .. ماراهي عارفة وين طاحت و معامن طاحت .. افكار متضاربة فراسها .. اسئلة ترووح و اسئلة تجي .. خايفة دير خطوة غالطة .. خايفة تتكشف قدام عزيز و يقتل عماد الدين .. ملاكها الحارس .. لي مش عارفة من وقتاش ولا كيفاش حتا ولات تخمم فيه .. و فحمايتو ..
و هي قاعدة هكاك تخمم دق الباب .. سمعت صوتو من برا ..
عماد الدين : لينة ..
قدنت للباب و فتحتها .. طاحت عينها فعينو ..
كانو عينها يهبلو فيهم لمعة غريبة .. يمكن لمعة حب و لمعة اعجاب .. اما عينين عماد الدين كانو كلهم شك .. اما مستحييل انو تتخبا من عينيه نظرة اهتمامو بيها و لهفتو عليها ..
لينة : انعم ..
عماد الدين : خالي جاب العقد .. لازم ننزلو نوقعوه ..
لينة : حاضر راني جاية ..
خرجت غلقت لباب و حبطت من وراه ..
لحقو لصالون لقاوهم مجتمعين تما كعادتهم ..
تقدم عماد الدين لطابلة و تقدمت موراه لينة .. لمحت فوق الطابلة العقد و الدفتر العائلي ..
للحظة غطست فمخيلتها .. كانت تحلم كمل بنت تخرج تحت يد باباها .. ببرنوسها الابيض .. تحت زغاريت عايلتها و يماها .. تودع فيهم و دمعتها على خدها ..
رايحة لراجل يحبها .. لسيد الرجال لي خطف قلبها بعد باباها .. الكورتاج لي داروهولها يهول الدنيا و يزهيها .. تتصدر و هي فرحانة .. و يوصل وقت الصح وقت تتغلق باب الغرفة عليها و على لي داها .. تسلملو نفسها و هي واثقة و فرحانة .. و يلحق الصباح و ترجع مرتو و بصمتو عليها خلاها ..
غرغرو عينها بالدموع .. تحس بفراغ فقلبها .. شعوور مستحيل تحسو .. لا هي ولا امثالها .. ( علابالي كاين لي بكيتهم و خاصة اليتامى سمحولي حتا انا راني نبكي معاكم تأثرت )
دار خزر فيها عماد الدين وقت لي حس عليها وقفت .. شافها سارحة فالدفتر العائلي و عيونها مليانين دموع .. رما يدو بلا ميحس و شبكهم معا يدها .. كأنوو قاعد يقوللها انا هنا رغم انو ماشي عارف بحكايتها .....
〰️〰️〰️〰️〰️〰️〰️〰️〰️〰️
اوبالاتي 🔥
قتلتكم بالمشاعر ليوم علابالي .. اياا اياا اطلقوو العنان لتوقعاتكم و ارائكم الطويلة العريضة .. رؤيا راهي مابنتش متنساوهاش .. و زعما راح نخسرو حكيم كيما خسرنا لؤي .. و شكوون هي شخصية المجهول ..
جمجمووو الحلقات كامل و تعليقاات فالرد عميراتي ..
#ليلوشة
أنت تقرأ
⚜️ الأسيرة و المتدين ⚜️
Action⚜️✨ الأسيرة و المتدين ✨⚜️ 🔸 حصريا على كرونيكات اوبال 🔸 بقلم : Leila Ouaras ( ليلوشة ) •.............................................• اوبالات 🔥 رجعتلكم ليلوشة بكرونيك جديدة بعد ما عشقتو فكرونيك #عشقت_سَلَفِي 🧡 رجعتلكم بكرونيك...
