💐الحلقــ30ــة "القســـ2ــم " 💐
❤✴❤
شي عجب صارلها ...اول ماسمعت ايلي قالو الجراح انهارت ...بكات ...تأوهت و دعات من قلبها باش توفى حياتها لفم...ماعادش عندها حيل تزيد تتحمل عذاب الدنيا ومصايبها ...لكن ...لقات مشاعرها تتجمد بعد سوايع قعدتهم وحدها في سطح السبيطار ...دموعها تجف ...تسكت آهاتها ...و تضيع بعينيها في السماء ...مافاقت من سرحتها كان على صوت ساقين وراها ...تلفتت تشوف شكون لقاتو عبد الجليل ....تنهدت ورجعت تخزر للسماء ...وقف بجنبها وخزر بعيد بدورو ...
قررت هي ايلي تبدى الحديث "أكيد لوجت بارشا باش تلقاني هوني...فمة حاجة جديدة صارت ؟! "
"مافماش حتى شي جديد ...ومالوجتش بارشا. ..سألت روحي اذا تضيق بيا الدنيا وين انجم نكون ...وهكا لقيتك...فاش كنت تخمم ...وفاش كنت سارحة "
تنهدت وهي تحكي " كنت نقول ... شوف روحك ياتولين وين ...وتفكر شنوة كانت حلمتك ولوين كنت حابة توصل ...شنوة ربحت وشنوة خسرت ...قرايتك وماكملتهاش ...لا بو ولا ام تعرفهم...شرفك وضيعتو ...قلبك وتكسر ...بنتك وتولدت مريضة ...راجلك ايلي غطاك بجناحو وسترك يرقد بين الماكينات وماتفصلو ع الموت والا الحياة كان سوايع قليلة ...شنوة ربحت ؟!...شي ...كان الفراغ ..."
" معناها طريقك من اولو غالط ...واذا ناوية تكمل ها الطريق ...حط في بالك انك باش تخسر اكثر واكثر ..."
خزرتلو بانتباه " باهي ...وشنوة الحل ...شنوة نعمل ..كيفاش نتصرف وانا في فم المدفع تو ...نتحرق بين نارين ...حابسة على بلاصتي حتى شطر خطوة ماانجمش نقدمها ...قلي ...دلني للثنية الصحيحة...مليت وكليت ...عييت ومعادش عندي نفس نكمل بيه..."
"انت يا تولين ...لازم تعرف ايلي ليك وايلي خاطيك...تعرف وين واقفة بالضبط...شنوة وراك وشنوة قدامك...وين لازم تمشي بخطواتك...انت يا تولين شكون تحب تخليه بجنبك ..والا خليني نقلك...شكون يستاهل تخليه معاك...نزيد نسهلك هو ايلي لقيتو في كبوتك ..."
اعترفت "أمي ...واركان ..." خزرتلو على جنب " حتى انت سي عبد الجليل ...وقفت معايا ...رغم ايلي ماجمعتنا الصدفة كان مرات قليلة "
دق قلبو للكلمة، تحمس في كلامو " انا معاك...اولا لانك مرت اركان ...ثانيا لانك بنت ..."نزل على سنونو يأنب في روحو ع التهثريب ايلي زلط من فمو " لانك بنت ناس وماتستحقش ايلي صارلك "
"سي عبد الجليل ...قلي ...جربت تخسر ثيقتك في حد ...جربت تتصدم في حقيقة انسان كان قريب منك ...جربت احساس يدك وساقيك تتكبل وتتجبر على حاجات انت بعمرك ما كنت تتصور روحك تعملهم "
"جربت ...والتجربة علمتني بااارشا ..." زم شفايفو " تقصد في أحمد "
"لا ...في أركان ..." تنهدت من اعماقها " موش ديما اخنا الضحايا ...ساعات احنا الجانين ومانحبوش نستعرفو ... اركان ...عاش معايا مجبور ...ربى بنتي وتحملها مجبور ...رمى روحو للموت مجبور ...وثق فيا وعطاني اسمو ...وثق فيا وتحملني بوسخي ...بقلة حيلتي ...بضعفي ... بنقصي. .بامراضي النفسية ..."لعقت شفايفها " قلي بربي ...المرا بالنسبة للراجل شنوة ؟!!! "
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Cerita Pendek★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
