💐الحلقــ30ـة "القســ3ـم "💐
❤✴❤
مسد كتفها وشجعها بتبسيمة وهي مشات بجنبو...حكات ايلي عندها ولقاتو يسمعها للاخير ويخفف عليها ...في العادة كتومة ...تسكر على كل شي وماتحكيهوش ...وهو ...رغم انو معرفتها بيه ماهيش كبيرة عقد لسانها الكل تحلو قدامو ...نيتهم كانو يتفقدو أركان ويشوفو كيفاش ينجمو يطلو عليه ...الجراح قال اربعة وعشرين ساعة هي الفصل ...والمدة ايلي طلبها باش يحكم على حالتو كملت ...كان عندها امل كبير ضوى بين ضلوعها ...وتخيلت كيفاش باش تسمع خبر انو حل عينو وفاق ...
حركة ماهيش عادية خلتها تدخل بعضها وتحس انو املها بدى يتبخر شوية شوية ...شافت الطبيب المسؤول على حالة اركان يخرج من عندو و مافمة حتى بشاير على وجهو... خضت ضلوعها ...وحست بجروحها تنز ...هرولت ناحيتو وعينيها محلولة على كبرهم ...سالتو تستنى تسمع نفي للشك ايلي سيطر عليها " شنوة صار لأركان "
خزرلها ومن بعد خزر لعبد الجليل ...هز اكتافو وصارحهم " مع الاسف ...المريض دخل في حالة غيبوبة ..."
" شنوة معناها في غيبوبة ...موش قلتو انو عملياتو الكل ناجحين ...يدخل في غيبوبة لواه. ..فهموني "
حاول الطبيب يهديها " مدام...يظهرلي قلنالك من امس انو كل شي وارد في حالتو .."
سأل عبد الجليل " ايه وتوا ...شنوة ايلي باش يصير "
هبط الطبيب راسو وظاهر انو عندو كلام تحت لسانو موش منجم يقولو ،رجتو تولين " باش يقعد في الغيبوبة...ماهوش باش يحل عينو ...؟!"
تنهد الطبيب ولخص كلامو قد ما ينجم " حالة سي اركان ...مربوطة بالوقت ...صدقني يا مدام ...ملي جاء لهوني واحنا مجندين على ذمتو ...عملنا كل شي ...مابخلنا عليه بحتى حاجة ...وتوا ...مابقى كان ..."
خير يربت على كتفها عوض انو يقول كلمات ينجمو يزيدو يخلوها تنهار ،تعدى من جنبها وخلاهم واقفين ...جامدين على بلايصهم ...موش عارفة علاش ها الدنيا المغبونة عاملة معاها هكا ...فمة ناس زعمة كيفها...فمة شكون من بين البشر الكثار عانى هكا ؟! ...كبس عبد الجليل على اكتافها وجبرها انها تهز راسها وتخزرلو
" تووولين...احنا فاش كنا نحكاو...اي مشكل باش تعرضنا ...باش ناقفولها مع بعضنا ...وحتى لو انت وحدك اضطريت تواجها...خمم كان في الشطر المليان متاع الكاس...اي ...اركان دخل في غيبوبة....لكن مازال حي...متخيلة انو ايلي صار معاك هذا الكل ...باش يحبس هوني...قلت انك ماريت في حياتك كان الحاجة الخايبة...يعني الحاجات الباهية جاية في الثنية ...زيد اصبر...وتحمل ...واقف كيف الزيتونة قدام الريح ...حتى لو نفض عروشك ...فباش تقعد مغروسة في تربتك ....وعروقك تنبض..." مسح وجها " اقف لروحك ...وماتستنى حد يعاونك...عندك بنتك ...مستحقتك...و عندك راجلك ...وحربك مع احمد ...هاذم الكل يستحقو تولين اخرى غير ايلي نرى فيها تو "
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Short Story★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
