💐الحلقــ30ـــة "القســ4ـــم "💐
دارت الكاتبة ع الطاولة العريضة وهي تحط قدام كل واحد ملف فيه وريقات يتعدو ع الحساب ،ترأس الطاولة الفاضل على يمينو ناظم و على يسارو احمد ...في الجهة المقابلة قعد عزوز وبناتو الزوز على اجنابو ، بقية الكراسي كانو فيهم كعبتين عندهم أسهم قليلة ،والبقية كانو رؤساء المصالح والاقسام ايلي تابعة ناز ،بعد ما كل حد قرى وعاود الاوراق ايلي قدامو قرر عزوز ياخو الكلمة ويستهل الاجتماع
" يظهرلي...ماعندنا حد آخر نستنوه...الزوز ايلي عندهم نسبة اسهم كبيرة قررو مايحضروش معانا ها الاجتماع المهم ...احنا اتصلنا بيهم وعملنا واجبنا معاهم والاطراف الزوز ...قالو ماينجموش يحضرو لظروف خاصة ...بالمقابل احنا مجبورين نخدمو على ارواحنا...مصالح ناز مالازمش تاقف لاي سبب كان ...حتى لو غابو اصحابها ...لو انا والا سي الفاضل جراتلنا حاجة مثلا ...اولادنا يكملو علينا..وحتى دولاب من دولابات ناز باش ياقف بعدنا .....لذا احنا باش نضطرو نخدمو بالتوكيل القديم كيف ماستانسنا ...ونيابة عليهم...باش نختارو رئيس جديد لناز ...نعرف...كنا متفقين على ها المنصب وسي الفاضل قايم بواجبو مشكور ...لكن ...تفرعست الاومور شوية وقت جاء سي اركان وسي عبد الجليل...وطلبو ها الاجتماع ... لكن...هاكم تراو على عينيكم ...حد ماحضر منهم...بون ...سي اركان معذور هو توا بين حياة و موت وماانجمو نقولو كان ربي يخفف عليه ...ورغم هذاكا حبينا اي حد من عايلتو يحضر وينوبو ... كلمنا اختو وهي رفضت باش تجي وقالت بالحرف الواحد' ماناش مستحقينها ناز متاعكم ' "
خزرو الحاضرين لبعضهم مستغربين من ايلي سمعوه وقدام هاك الحالة استغل عزوز الوضع وحب يزيد ع الطين بلة " ..كي تجي تشوف ...قالت الحق...ناز متاعنا ...كبرناها ...وخلينا اسم رقم واحد في عالم الازياء وعطينا من روحنا ومن عمرنا باش خليناها في ها المستوى وحد ماينجم يقدر مجهودنا كان ايلي تعبو معانا اما ايلي عاش بعيد و فلوسو واصلتو من غير لا يتعب ولا يشقى ..."اتكى ع الكرسي متاعو وستيلو بين صوابعو يلعب بيه " لذا...ليوم باش نصوتو...لرئيس جديد لناز ...او بالاحرى نعاااودو نصوتو ...وايلي متقدمين هوما ...المرحوم اركان ...قصدي ...ولد المرحوم عادل ..."شاور للفاضل ايلي يتبسم " وصديقي و خويا الفاضل .. الربط والحل بيديكم انتوما ...انتوما تقررو شكون تراووه قادر يملى كرسي الرئيس المدير العام لناز "
خذى واحد من المجتمعين الكلمة منو وحب يستفسر " ومدام زينب ؟!...ماهيش باش تحضر ...هي زادا عضو في مجلس الادارة "
جاوبو احمد " مدام زينب ...وايلي هي امي ...عطاتني توكيل ...باش انوبها في الاجتماع "
حط الفاضل كفوفو على اجناب الطاولة " نبداو مالا التصويت "
واحد من الحاضرين حط ستيلوه فوق الورقة ايلي من المفروض يختار منها اسم المدير الجديد وعقد صوابعو " يظهرلي ...اعضاء المجلس ماهمش كاملين ...وحسب معرفتي ...سي عبد الجليل ...مارفضش الاجتماع. ..ماذبيا نزيدو نستناو شوية "
ضحكت ريما على جنب " سي عبد الجليل موكل سي الفاضل ...وبها التوكيل باش نبداو الاجتماع "
خزر هاك العضو للكاتبة ايلي واقفة وسألها " حد علمي ...وصلك فاكس الصباح ...فيه التوكيل الجديد..."
بلعت الكاتبة ريقها وخزرت للفاضل " ما ...وصلني شي ..."
هز احمد حاجبو " اما توكيل ايلي تحكي عليه بالضبط سي عامر "
جبد عامر من بين اوراقو ورقة ووراهلهم " نحكي ع التوكيل هذا ..."
بلع الفاضل ريقو وشاور للكاتبة باش تجيبهولو ، دوب ماخذاه وقرى اسم الموكل الجديد ....عقد حواجبو موش فاهم ...هز عينيه خزر لاحمد ومن بعد لعزوز " ها التوكيل هذا موش قانوني "
تخل الباب على وسعو وظهر من وراه راجل في الخمسين،شطر شعرو شايب ويادوبك باينة خطوط السنين على ملامحو عكس شعرو ...تبسم للوجوه الباهتة "سامحوني ع التأخير ...المفروض الاجتماع يبدى العشرة ...لكن انتوما بديتوه التسعة ..." قوس حواجبو " لكن يظهرلي ماوخرتش بارشا "
خزرلو ناظم من فوق لفوق"وشكون سيادتك ...مانتفكرش انك عضو ...معانا ولا مستدعي لها الاجتماع "
ضحك فريد وخزر وراه " في الواقع ...مانيش انا العضو...انا المحامي فريد ...وموكلتي هي مدام تولين سويدي...وهي ايلي باش تنوب ...سي الفاضل ...وسي اركان ... "
حل احمد فمو وماردو ،وساعت عين ناظم وخزر طول لبوه ، هز عزوز حواجبو وزم شفايفو بغل ظاهر ، تبسمت نورس على جنب و رجعت لاوراقها تلوج لعل تطيح بها التوكيل المحنون ...وقفت ريما وضربت الطاولة " ناز ماهيش كوري باش ايلي يجي يولي عضو "
في هاك اللحظة ...اختارت تولين انها تدخل ...بكامل اناقتها ...بكامل زينها ...بكامل انوثتها ...بحضور طاغي خلى الموجودين يسكتو ...تبسمت وهي تاقف جنب لجنب مع فريد المحامي " بالضبط...مدموازال ريما ...ناز موش كوري ....انجم ...نفهم انت كيفاش دخلت "
💐نهاية الحلقة 30 💐
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Nouvelles★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
