💕أنت قلبي٢💕

الحلقة ٩١

#انت_قلبي٢
#بوسي_مصطفى
______________
الحلقة ٩١

في منزل عائلة كريم.. في شقة أكرم.
علي : اوعي بقى يا ندى
انتِ مالك قافشه فيه كده زي اللي ماسكه حرامي!!
ندى : ما أنت مفرقتش حاجه عنهم.
علي : ندى لو سمحتي متغلطيش.
ندى : ليه يا حبيبي هو انتِ فاكرني مش شايفه حضرتك
و انت بتشاور لـ علياء من فوق السطوح علشان تطلع عندك..
علي : طب و فيها ايه دي؟!
ندى : يا بجاحتك يا اختي و كمان شايف إن عادي كده
تستدرج بنت بريئه علشان...
يقاطعها علي : استدرج ايه يا ندى انتِ فاهمه غلط.
ندى : هو ايه دا اللي أنا فاهماه غلط يا استاذ علي ليه فاكرني غبيه زي حضرتك؟!
علي : طب و ليه الغلط دا بقى و بعدين انا  غرضي شريف.
ندى : على فكرة أنا كنت طالعه علشان ابهدلك بس دخلت تاني بسرعه لما شوفت كريم ابن عمي
قولت بلاش اعمل شوشره و كل دا علشان البنت بس إنما أنت تستاهل اللي يجرالك.
علي : ما هو حضرته طلع عندي و اداني اللي فيه النصيب محاضرة طويلة عريضه عن الأخلاق
و إن دي أمانة في بيتنا و ازاي اخون الامانه و كلام من دا
دا فكرني إني في دماغي حاجه وحشه.
ندى : امال ايه اللي في دماغك يا استاذ علي؟!
نورنا!
علي : انا كنت عايز اتقدملها بس بصراحه صرفت نظر بعد اللي حصل.
ندى : بطل كدب يالا هتتقدم منين يا حبيبي هو حضرتك معاك جنيه من حر مالك تاني حاجه مش لما تخلص جامعة دا انت راكن اهو في تجارة اديلك ست سنين اما نشوف دي هتبقى آخر سنه و لا ايه نظامك
تاني حاجه بقى انت لا كنت عايز ترتبط بـ علياء و لا يحزنون انت كنت بتجس نبض و خلاص البنت جارتك في السكه بتاعتك كان بها صديتك و اديتك فوق دماغك هتبعد عنها
انا اختك و اعرفك كويس اوي..
علي : على فكرة انتِ ظلماني يا نونا انا بس كنت عايز اخد رأيها في الحوار دا.
ندى : بالليل و فوق السطوح
و الدنيا ضلمه يا اخي الواحد مش عارف يعمل ايه في قرفك دا احترم نفسك بقى علشان المرادي لو متعدلتش هقول لبابا.
علي : لا بابا لأ يا نونا حاضر هبعد عنها خالص.
ندى : علي لو شوفتك و لا سمعت بس مجرد سمع إنك قربت ناحيتها هيتقال لبابا و انت عارف وقتها هيحصل ايه ركز
يا اخويا في السنه اللي فضلالك علشان تشتغل و وقتها ابقى حب و اتجوز بس تدخل البيت من بابه مش زي الحراميه بتتسحب على السطوح.
علي : خلاص بقى يا ندى قولتلك هبعد عنها حاضر.
_______________

في شقة حلمي.. والد كريم..
علياء : هو دا كل اللي حصل يا دكتور.
سميرة كانت قاعدة في آخر الصالة جنب الغرفة بتاعتها.
سميرة : هو فيه ايه يا كريم يا ابنى؟
كريم : مشكلة كده يا ماما بنحلها.
سميرة : طب تعالي اديني الحقنه اخوك اتأخر الليلة
و انا عايزة انام.
كريم : حاضر يا ماما
اسمعي يا علياء انا طبعا عارف أخلاقك و انك مستحيل تعملي حاجه تخجلي منها و كمان بتحبي مامتك و اخواتك
و عمرك ما تزعليهم منك علشان كده بقولك لما تيجي هنا لماما متطلعيش فوق عند أي حد لا الاستاذ حازم و لا شقة دكتور علاء و لا عمي مهما كان و لو حد سألك قوللهم اني قولتلك مخرجش من البيت خليكي هنا مع ماما.. اوك ؟
علياء : حاضر يا دكتور.
كريم : باتي مع ماما الليلة علشان الوقت اتأخر و لا تحبي اوصلك؟
علياء : لا هفضل هنا مع مامت حضرتك.
كريم : طيب كلمتي مامتك؟
علياء : اه قولتلها.
كريم : تمام ممكن تدخلي تنامي.
علياء : لا هقعد لحد ما الحاجه تنام يمكن تحتاج حاجه.
كريم : براحتك... هاتي ايدك يا ماما.
سميرة : أسند كويس يا كريم انت شكلك تعبان.
كريم : لا أنا كويس..
سميرة : طب هات الدوا من عندك.
كريم بيجهز الحقنه..
سميرة : خف ايدك يا ابني اخوك امبارح خلاني اصرخ.
كريم : ليه بس ايه اللي حصل؟
سميرة : كان بيكلم ابنه و مش واخد باله و الواد عمال يتشقى كنت هروح فيها بسبب الحقنه دي.
كريم : بعيد الشر عنك يا ست الكل.
سميرة : محستش بيها تصدق
علاء برضه ايده خفيفه بس مش عارفه كان ماله امبارح
مش مظبوط كده و ابنه مبطلش لعب حوالينا.
كريم : خير يا ماما متقلقيش هتحتاجي مني حاجه؟
سميرة : لا يا حبيبي خد بالك و أنت سايق يا كريم.
كريم : حاضر يا ماما تصبحي على خير.
سميرة : و أنت من اهل الخير يا ابني.
{عند باب الشقة}
علاء : اهلااا كويس إني لحقتك.
كريم : لا لحقتني ايه انا مش قادر خلاص عايز اروح انام.
علاء : خلاص خليها يوم تاني بقى.
كريم : لو الموضوع مهم اقعد اسمعك.
علاء : لا مش مهم اوي يتأجل يعني عادي.
كريم : اوك.. ماما اخدت الحقنه و سيبتها تنام.
علاء : طب كويس أنا كنت جاي ادهالها.
كريم : علاء عايز اطلب منك حاجه.
علاء : يا سلام.. اتفضل.
كريم : خلي بالك من علياء.
علاء : مش فاهم اخلي بالي منها ازاي يعني؟
كريم : يعني بلاش حد من فوق يطلب منها تعمله حاجه
خلي جهدها بس هنا تراعي ماما و تشوف طلباتها.
علاء : خلاص حاضر.. أنا عن نفسي مبطلش منها تعمل حاجه في شقتي.
كريم : بقول على البيت كله يعني يا علاء محددتش انت
او حد تاني.
علاء : طيب حاضر علم و ينفذ.
كريم ببتسامة : سلام عليكم.
علاء : و عليكم السلام.
_________________