💐الحلقة30 "القسم 2 " 💐
❤✴❤
خرج فاضل من صينتو ومعادش عينو يحافظ على رزانتو وهيبتو " لا ...مستحيل ...ماهوش معقول.... اكيد فمة ترافيك في الحكاية"
جاوبو المستشار وهو يسكر دوسيه" تشك في نزاهتنا سي الفاضل بعد ها السنين "
صاح باعلى صوتو " نشك في كل شي...مستحيل حاجة كي هكا تصير...هاذي مايقبلهاش العقل بتاتا "
نڨز عزوز على اقرب عضو من مجلس الادارة وخنقو...غاضو يشوفو فرحان ويهني في تولين " قداش قبضت يا خاين...كنت معانا طول ها السنين وتوا قلبت الفيستة فيسع ...بقداش شراكم اركان ؟! "
دزو عليه وهو يحاول يهندم في حوايجو ويستويهم بعد ما مركسهملو " مانسمحلكش سي عزوز..." هزو وحطو هو و الفاضل " الناس الكل شافو على عينيهم ايلي التصويت كان نزيه وقانوني...وانا اخترت الرئيس اامناسب للفترة الجاية "
صاح الفاضل" اللعبة تلعبت قبل الاجتماع "
تكلم عضو اخر" سي الفاضل...قبل ماتبداو الاجتماع حكيتو على ناز وقلتو ايلي مصالحها قبل كل شي واحنا صوتنا للشباب ايلي ينجم يطور ويزيد في نجاح ناز...انت يعطيك الصحة ها السنين الكل خدمتها بضمير...لكن ...جاء الوقت ايلي لازم نبدلو من ارواحنا لمصلحة ناز "تلفت لتولين " مبروك عليك وعلى سي اركان ...وان شاء الله ماتخيبوش ثيقتنا فيكم"
تبسمت تولين وهي تمدلو يدها " تهنى سي عامر...سي اركان عندو سنين في ادارة الشركات وخبرتو محترمة بارشا في ها المجال ...ماهيش باش تصعب عليه ناز "
خزرت على جنب لفريد ايلي كانت عينيه مركزة في وجوه عزوز والفاضل يتشفى بشوفتهم محموصين ومقهورين ....اول ما حس بخزراتها تلفتلها ...تبسم وربت على اكتافها...خطوة كبيرة وفيها بارشا مجازفة ...لكن نجحو فيها .
🔽فلاش باك 🔼
✴✴
زربت في مشيتها وقت شافت عبد الجليل واقف ويحكي مع وحدة من الفرامل ،في هاك الحالة مانجمتش تصبر وتستناه لين يكمل ،الكلام ايلي عندها ماينجمش يستنى ..وقفت حذاهم ولعقت شفايفها ايلي يرعشو وقصت على حديثهم بلا مقدمات " حاجتي بيك في موضوع اكيد "
خزرلها بشك ومن اول ماشاف لون وجها المتبدل نجم يفهم انها ماهيش في صحنها ،جبد روحو من الفرملية بكلمتين ودارها بكلو باش ينجم يشوفها مليح ويسمع شكوتها " شفمة ؟!شبي وجهك مقلوب ؟! "
كبست عينيها بقلة صبر وهي تنطق بايلي يدور في راسها " عبد الجليل بن الرجب ...خو الفاضل بن الرجب ...عم احمد بن الرجب..." خزرتلو " انت واحد من العايلة ايلي ماخلو ما عملو فيا ...موش هكا ؟! "
قعد يثبت فيها للحظات وبعد تنهد ....شيع عينيه بعيد وهو يجاوبها بسؤال اخر "تحب تقول انو انا زادا ...عدوك؟! "
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Nouvelles★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
