💐الحلقة 32 " القسم 4"💐
❤✴❤
تململ في بلاصتو ورجع غطى وجهو بمرفقو...ماذبيه توفى ها الحكاية في اقل وقت ممكن ،طيشت الدوسي على صدرو " علاش تخبي في وجهك ...اخزرلي ...واجهني بعينك وبصوتك ...قولها بعظمة لسانك و سمعهالي "
ماكانش طايق يسمع كلمة منها ...حل عينو بعصب ومن غير مايخزرلها مد يدو للستيلو ايلي ع الطاولة و بلا شفقة وقدام بهتتها صحح تحت اسمو ...طيشها عليها كيف ماعملتلو و ها المرة عينو واجهتها وصوتو كان فيه بارشا حزم " من الاحسن يكون طلاق بالتراضي ...حقك وحق بنتك باش تاخذو و بالزايد "
لقفت الورقة وماخلتهاش تطيح ...ضغطت سنونها على شفايفها "وقداش باش تعطيني انا وبنتي ...!؟ ...قداش نسوو عندك فلوس زعمة ؟!"
نفخ بعصب ...علاش ها القصة ماتوفاش؟!...مجرد تصحاحة وتوفى ها الرواية ... "انت اطلب وانا نعطيك قد ماتحب "
هزت حواجبها وعوجت فمها " اول خطوة تعملها بعد ماترجع من الموت... تطلقني..."كتفت يديها " والسبب ؟! "
لخص الحكاية "وفى المكتوب "
واجهتو باعصاب باردة "المكتوب بيني وبينك مازال مابداش...وانت تعرف هذا اكثر مني "
صر سنونو "اخرج تولين ...تاعب وماعيني في حديث...عندك كلام احكيه مع المحامي "
شدت صحيح في سؤالها "علاش تحب تطلقني "
هكا هي تكون كثرتلها وخلت اعصابو تفلت منو ..ضرب الطاولة بكفو قلبها وصاح "تحب تعرف علاش؟! ...باهي ..." ضرب بقوة على فخذو " اخزر ...شوف ...لاهي مني ولا انا منها ...ميتة لا عرق حي فيها ..." قاومت باش ماتبكيش وهو طلق لسانو وخلاه يخرج ايلي مخبي بين ضلوعو ...موش عادتو يشكي...لكن ها المرة فاض كاسو " تحب نقلك السبب ...باهي ..."
كبس جفونو وهو يضغط سنونو" السبب اني عالة ...باش نكون عالة عليك...باش يكون عندك طفل صغير اخر...." خرجو الكلمات الاخرين في جرة بعضهم وكاينو حافظهم... ماخذاش حتى نفس بينهم " تقعدو وتوقفو وتلبسو وتهزو و تحطو وتدورو وترقدو وتقومو ...." هرب بعينو خايف يفضحو ضعفو " باختصار انا عبد عاجز ...مشلول ماينفع في شي "
ضيقت عينها وشيعتها لساقيه "صحيح ...انت عاجز...ومشلول ..." ضحك بمرارة ...كيف نطقتها هي وقتها باش حس بقسوة حالتو ...وقتها بالخق عرف انو عاجز ومشلول ...بالنسبة لتولين ماوقفش كلامها فم ...كملت تحكي عادي موش باين عليها حتى تأثير " لكن في مخك...وفي بصيرتك ...تحب اطلق قتلي اه ...اتو نصححلك ...لعل تبرد نارك كي نصحح و ترتاح...باهي ...هات الستيلو "
نطرت من بين صوابعو الستيلو وركزت الورقة ع الطاولة وكيف ماعمل هو بالضبط صححت من غير ماتتردد غم عليه قلبو وحس انها قلعتو بعروقو و مشات عليه بصباطها...بهاك السهولة هان عليها وهو ايلي تصور ورسم في خيالو ردات فعل اخرى...مثلا ...تبكي ...توعدو تستحفظ عليه ...توعدو تقعد معاه وتصبر على عجزو ....ساعات ناخذو قرار بعقلنا وقلبنا موش راضي عليه ...قرار نحبو نبعدو بيه على بشر وانحوه من حياتنا ...لكن في داخلنا يكون فمة صوت يترجى ويتمنى انو هو ايلي يتمسك بينا وما يتخلاش علينا بدورو..موش كل كلمة ابعد يعني امشي وخليني ...ساعات كلمة ابعد تعني اعطيني كتفك نتكى عليك ...ساعات كلمة ابعد تاست صغير نحبو نشوفو رواحنا شنسوو عندو ...وهو كان حابب انها تتمسك وماتخليهوش ...كان حابب يعرف شكون اركان بالنسبة لتولين "
خذات الورقة بين صوابعها الزوز وحطتها في وجهو " ...هاو التصحاح...ريتو ...رتحت توا ...هاني صححت ...وبعدها نمشي نلم دبشي انا وبنتي ونرجعو لولد الفاضل بما انو طالب رجوعنا ليه وسيلين بكل الاحوال بنتو ولازم تتربى في حضنو ....بعدها ...نعرس بيه ونعيشو في سعادة جميع ...هذا ايلي خممت فيه موش هكا ؟! ...نعيش معاه بعد ايلي عملو فيا... ومع بوه بعد ايلي عملو فيك ... و مع امو ايلي شربتني السم وخلات ارحامي تنزف وتتهدم بلا رحمة .."
ضيق عينو وخزرلها بانتباه وبشك ..كلماتها كانو مشربكين وغامضين ...لكن فهم انو وراهم قصة ولعل هاك النزيف ايلي جرالها وايلي مازال راسخ في مخو عندو صيلة بايلي سمعو تو.
قرات البهتة على وجهو ولقاتها فرصتها باش تزيد تربح نقاط عليه "شنوة!!... مافيبالكش؟! ..." مالت عليه بكل جرأة لين انفاسها تلحمت مع انفاسو " مازالت بارشا حاجات ماتعرفهمش عليا ...ولا انا نعرفهم عليك ...لذا .. " بعدت عليه شوية و بكل برودة دم قطعت الورقة " هاو الطلاق متاعك ...ريتو..." شاورتلو بالانصاف المقطعة " ثبت ...فيه هاااو ...هااااو الصفا .....هاو...."
زادت قطعتهم وفتفتتهم بكل عصب وبعدها حطت هاك الطروف الصغار ع الطاولة ورجعت قربت منو " هاه نزيد نقلك ..انت راجلي حبيت والا كرهت ..." هزت حواجبها " خليك اول راجل مرتو تعرس بيه بالسيف ...تكرهني ...ماتطيقنيش ...باهي ...اكره قد ماتحب ...اما مدام انت مشلول في راسك ...شتلقاني لاصقة فيك ...باش تقول رخيصة ....قول ...بلا كرامة ...قول ...طماعة ...قول ..."صرت سنونها بتحدي " شنبقى تولين سويدي بالسيف عليك...ها الايامات حاسة بقوة جبارة فيا ...عبارة شيطان تملكني... ....حاسة اني باش نمشي ها العالم الكل تحت يدي...كل حاجة حبيت عليها باش ناخوها ..بطيب الخاطر والا بالسيف "
💐💙نهاية الحلقــــ32ـــة💙💐
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Короткий рассказ★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
