💕أنت قلبي٢💕

الحلقة ٩٣

#انت_قلبي٢
#بوسي_مصطفى
_______________
الحلقة ٩٣

في شقة سيف..
سهر قاعدة و مشغله التليفزيون
عينها غفلت شوية..
سمعت مليكة بتصرخ جوه.
قامت بسرعة..
سهر : مالك يا روحي ؟
مليكة بتتألم : مامي أنا تعبانه اوي.
سهر : طيب قوليلي حاسه بـ ايه؟
مليكة همست في ودنها.
سهر : ايه؟؟؟
يبقى لازم تروحي للدكتور حالاً.
مليكة و هي بتبكي و تصرخ : فين سيف؟
سهر : جوه الظاهر نام هخبط عليه يقوم بسرعة.

سهر قربت من باب الغرفة
و بتخبط.
سهر : سيف... سيف.. مليكة تعبانه.
كان سيف نايم لإنه منامش بالليل.
سهر تنادي مرة تانية و تخبط.
سيف فتح عيونه وبيحاول لسه يفوق و يستوعب الخبط
اللي على الباب و بعدها سمع صريخ مليكة قام بسرعة فتح الباب.
سيف : ايه فيه ايه؟!
سهر بتبكي : مليكة تعبانه.
جري ناحية مليكة يطمن عليها.
سيف : ايه يا حبيبتى حاسه بـ ايه؟
مليكة و هي بتتألم و بتبكي : تعبانه اوي يا سيف.. هموت.
سيف لسهر : معلش يا طنط ساعديها تلبس حاجه مناسبه
و أنا هنزل اشغل العربية.
سهر : تعالي يا مليكة اساعدك.
مليكة و هي بتتألم و بتبكي : هموت يا مامي.
سهر : بعيد الشر عنك يا حبيبتي هتقومي بالسلامة و تبقى كويسه تعالي معايا بس اساعدك تلبسي حاجه تقيله شوية الجو برد بره.

سيف : كان بيشغل العربية...طلع بسرعة علشان يلبس
اخد جاكت ووضعه على مليكة و سندها و نزل بيها تحت
مع سهر.
سهر : خليها هنا جنبي يا سيف بس كلم دكتور كريم..
سيف : حاضر.
______________

في فيلا كريم ...
فريدة : محمد عنده دروس مش هينفع دلوقت.
كريم : خلاص يا فريدة مفيش مشكلة.
فريدة : هي طنط تعبانه اوي.
كريم بتنهيده و حزن : ماما مبقتش تتحرك خالص يا فريدة
كنت هناك امبارح لاقيتها يا حبيبتي نايمه و مش عايزة حد حتى يساعدها.
فريدة : لا أنا محمد يخلص دروسه و بعدها نخرج على طول.
كريم : هوصل المستشفى ساعة كده و بعدها هاخد الدكتور
و نروح لماما.
فريدة : خلاص و انا كمان محمد بس....
كريم يقاطعها : ثواني يا فريدة
مكالمة من المستشفى اشوف فيه ايه.
فريدة : خير يا كريم.
كريم : دي خامس مرة يتصل و انا مش فايق اكلم حد بصراحه
الووو.. سلام عليكم.
سارة : ايوه يا دكتور.
كريم ' سارة..
سارة : دكتور كريم في حاجه حصلت في المستشفى
كنت عايزة اقول لحضرتك عليها و كمان تيجي لاننا بلغنا البوليس.
كريم : بوليس ليه؟!
فريدة : فيه ايه يا كريم؟
يشاورلها كريم تنتظر شوية...
سارة : دكتور معتز اتخانق مع دكتور ممدوح معرفش ايه السبب.
كريم : ايوه و بعدين.
سارة : المهم دكتور ممدوح اتهور و كسر ازازة دوا في دماغ دكتور معتز.
كريم : ايه؟؟ و بعدين حصل ايه؟
سارة : الدكاترة هنا بيعملوا اللازم
في غرفة العمليات و الأمن هنا متحفظ على دكتور ممدوح.
كريم : طيب أنا جاي.
و بيقوم كريم من على السفرة بعد ما يقفل مع سارة.
فريدة : كريم فهمني فيه ايه؟!
كريم : خناقة في المستشفى
و دكتور معتز متعور و حاجه حلوة اوي على الصبح.
فريدة : طب اهدا بس و روح شوف فيه ايه.
كريم : أنا خارج يا فريدة إحتمال اتأخر الليلة.
فريدة : مفيش مشكلة اطمن بس على دكتور معتز و ابقى روح لمامتك كمان اطمن عليها.
كريم : ثواني اشوف سيف بيتصل.
فريدة : خير...
كريم : و عليكم السلام.
سيف : دكتور أنا آسف لحضرتك بس مليكة تعبت جامد
و أنا رايح بيها على المستشفى.
كريم : مفيش مشكلة يا سيف هو الدوا اللي اخدته أكيد السبب هاتها علشان نعمل العملية.
سيف : حاضر يا دكتور.
كريم ' متقلقش العملية بسيطه.
سيف : متشكر اوي يا دكتور.
كريم : أنا خارج اهو دلوقت تكون وصلت هناك.
سيف : إن شاء الله.
كريم : مع السلامة.
فريدة : مليكة بتسقط صح؟
كريم : ايوه.
فريدة : طيب محمد مفروض هيخلص على الساعة اتناشر
هبقى اجي على المستشفى اطمن على مليكة و بعدها نروح مع بعض اطمن على طنط.
كريم بيدور على المفاتيح.
فريدة : المفاتيح اهيه قدامك يا كريم.
كريم : قدامي و مش شايفاها.
فريدة : معلش يا حبيبى خد بالك بس من نفسك.
كريم : حاضر يا فريدة.. سلام.
فريدة بتنهيده : مع السلامة.
محمد.. محمد يلا يا حبيبي علشان المستر زمانه جاي.
محمد : في الجنينه برضه زي كل مرة؟!
فريدة : حبيبي مينفعش يدخل البيت و بعدين فيها ايه
دا حتى الجو جميل اوي و وسط الخضرة و الشمس الدافيه هتستوعب اكتر.
محمد : حضرتك شايفه كده؟!
فريدة : مش مقتنع صح؟
محمد : علشان بابي مش موجود و مينفعش حد يدخل البيت مع اني خلاص كبرت و بقيت راجل اهو و لو بابي مش موجود أنا مكانه لحد ما يرجع.
فريدة : طبعا يا حبيبي راجل بس معلش عديها بقى.
محمد : حاضر يا مامي.
فريدة : هو المستر قالك حاجه؟
محمد : لأ.
فريدة : خلاص امال مضايق ليه
يلا جهز الكتب بتاعتك و ظبط الطربيزة بره و اقعد راجع شوية عقبال ما يجي.
محمد : حاضر.
__________