Limang taon mula nang makitil ang kanyang kababata sa giyera kontra droga, isinumpa ni Clair na kailanman ay hindi na siya babalik pa sa probinsya ng Quezon. Kinumbinsi niya ang sariling kuntento na siya sa buhay bilang isang simpleng mamamahayag sa Maynila. Ngunit nang maatasan siyang sumulat ng isang lathalain kaugnay ng insidenteng nagsilbing bangungot sa kanya gabi-gabi, isang bagay lamang ang napagtanto ni Clair - hindi gano'n kadali makatakas sa mga alaalaang pilit niyang ibinaon sa limot. At ayaw man niyang aminin sa sarili, ang kanyang nakaraan ay habambuhay na magiging bahagi niya. [The Wattys 2025 Shortlist] Isang nobela, 2024

Sa harap ng mga convenience store. Sa busina ng mga sasakyan. Sa masikip na kalsada ng Pureza. Sa ilalim ng mga ilaw sa kalye. Sa makukulay na damit sa ukay-ukay. Sa ingay ng umiikot na washing machine. Sa Buendia Terminal. Sa mga nakaw na litrato. Sa mga lumang awitin sa radyo. Sa mga istasyon ng tren. Sa paglubog ng araw sa Sunken Garden. Sa mga pelikulang hindi tinapos. Sa mga pasikot-sikot ng Cubao Expo. Sa kaguluhan sa Intramuros. Sa nagpapang-abot nating mga daliri. Sa mga nawawalang bituin sa siyudad. And'yan ka na naman. Andito na naman ako. Pero minsan, hindi na kita mahagilap. Sa atin pa ba ang siyudad na ito? Isang nobela, 2025