WARNING: MATURE CONTENT | R-18 | COMPLETED | S T A N D A L O N E N O V E L | All she ever wanted was to be happy. Hindi siya ang tipo ng taong mapaghangad ng mga bagay na hindi niya maaabot o mayayakap. Kaya naman halos takasan siya ng bait nang dumating ang araw na kinailangan niyang unahin ang sarili bago ang iba. Alam niyang hindi magtatapos ang lahat sa paghingi lang ng kapatawaran sa mga naapektuhan dahil kahit saang anggulo mang tingnan, malaki ang kasalanan niya at walang ibang maaaring sisihin kundi siya lamang. Nang hilingin ng taong pinagkakautangan niya ang pagsuko niya ng kanyang sarili dito upang mabayaran ang napakalaking pagkakautang, wala siyang ibang nagawa kundi isuko na lamang ang sarili. Hindi na siya umaasang magiging maayos pa ang pagtrato nito sa kanya lalo pa't terible ang atraso niya rito. Ngunit may kakaiba sa paraan ng pakikitungo nito sa kanya na ayaw niyang bigyan ng pangalan. Naroon lang siya upang magbayad ng malaking pagkakautang. Ayaw niyang umasa, at mas lalong ayaw niyang masaktan. Hanggang kailan niya kayang manindigan na tanging paniningil lamang sa kaniya ang pakay nito kung habang tumatagal ay lalo lang siyang hindi makawala rito? Hanggang kailan tatagal ang pagbabayad niya kung wala rin itong balak na pakawalan siya kahit na kailan? -- THIS IS A STAND ALONE NOVEL! This has NOTHING to do with Freezell Series.

Started: 04/27/2021 Ended: 08/24/2021 Ang hirap palang tumanda. Ang hirap magbayad ng bills. Ang hirap suportahan ng pamilyang akala ay isang milyon ang suweldo mo. Ang hirap ngumiti sa nanay na mataas ang tingin sa'yo pero hindi ka kayang ipagtanggol. Ang hirap tabihan sa hapagkainan ng tatay na pinag-uubusan mo ng pera pero hindi ka maalala. Ang hirap mag-abot ng tulong sa kapatid na baon sa utang. Ang hirap intindihin ng hipag na nakakapagpa-rebond pa kahit kapos na kapos na. Ang hirap pakisamahan ng bunsong halos ilahad ang mga palad tuwing makikita ka. Ang hirap ngitian ng mga taong tanong nang tanong kung bakit hindi ka pa nakakapag-asawa. Ang hirap humarap sa mundong isasampal sa'yo na mag-isa ka. Tulong, bigay, utang. Isang iling mo lang, madamot ka na. Kasama mo sila kapag may maibibigay ka, pero hindi mo sila mahahanap kapag wala na. Ikaw ang kakayod, sila ang tutuka. Ikaw ang iiyak sa pagod, sila ang magtatamasa. Iyon ang summary ng buhay ko. Sobra-sobra ang naririnig na paghingi, kulang na kulang ang naririnig na pasasalamat. Sobra-sobra ang pagpapasensya, kulang na kulang ang natatanggap na pagpapahalaga. Sobra-sobra ang binabayaran, kulang na kulang sa kasiyahan. Kaya nang dumating sa buhay ko ang nag-iisang lalaking hindi ako nakita bilang naglalakad na alkansya, ang nag-iisang lalaking nakinig sa mahabang listahan ko ng problema, ang nag-iisang lalaking nagbigay sa akin ng kakaibang saya, ipinangako ko sa sarili na sa gitna ng hirap ng pagtanda, magtitiis ako basta't siya ang kasama. Kahit pa ang kapalit noon ay pagtalikod sa minahal na pamilya. Kahit pa ang kapalit noon ay paglaban sa mundong pinatatakbo ng kapangyarihan at pera. Kahit pa ang kapalit noon ay ang pagdurusa't pag-iisa. Siya ang ginhawa, pahinga, at kasiyahan ko. Dumating man ang araw na tanaw ko na ang dulo. Dumating man ang araw na wala na kaming sagot sa lahat ng bakit at paano. Dumating man ang araw na pareho na kaming talo.