[COMPLETED] Hindi siya malas sa pag-ibig. Magaling lang talaga siyang pumili ng maling tao. Si Sigrid-isang babaeng ilang ulit nang sumugal sa laro ng pag-ibig. Hindi na biro ang dami ng kaniyang naging kasintahan...kaunti na lang at hindi na sila magkakasya sa bilang ng kaniyang mga daliri. Ngunit sa kabila ng paulit-ulit na pagkasawi at pag-iwan sa kaniya, tila hindi pa rin siya natutong sumuko. Hanggang sa may dumating na naman na isang taong inakala niyang magiging iba sa lahat ng nauna. Ngunit sa panibagong pagsusugal ng kaniyang puso, tila muling kumiling ang tadhana laban sa kaniya. Para bang isinumpa siyang hindi mamahalin nang tama, kundi paulit-ulit na mapunta sa mali. Bakit pare-pareho ang sakit kahit iba-iba ang minahal? Iyon ang tanong na patuloy niyang ibinubulong sa sarili. Ngunit huli na nga ba para mapagtanto niya na minsan, ang mali ay hindi ang taong minahal...kundi ang sarili na patuloy na pumapayag? Sa kabila ng pagiging talunan niya sa pag-ibig, may pag-asa pa kayang dumating ang panahong siya naman ang mananalo? O mananatili siyang bihag ng sumpang siya rin ang unti-unting bumuo? Story Started: January 21, 2026 Story Ended: June 12, 2026

[ONGOING] Hindi siya malas sa pamilya, napunta lang siya sa mga pusong hindi marunong kumalinga. Isang nagluluksa na si Eugene, na tila isinumpang magkaroon ng sirang pamilya, ay napilitang harapin ang lahat matapos pumanaw ang kanyang lola-ang tanging taong kinilala niya bilang kanyang Mama at pamilya. Sa kanyang pag-iisa, pasan niya ang mabibigat na problema sa kanyang ama, na lalo pang pinalala ng pakikialam ng ilang kamag-anak, habang patuloy siyang nilulunod ng krisis sa pera at mga utang na tila minana niya nang hindi niya hinihingi. Dahil dito, tuluyan niyang isinara ang sarili sa pag-ibig...sa paniniwalang ito ang ugat ng kanyang paghihirap. Hanggang sa dumating siya: ang misteryosang babaeng bigla na lamang sumulpot sa kanyang buhay at dahan-dahang pinatunayan na ang pag-ibig pala ang matagal na niyang kailangan at hinahanap-hanap sa buong buhay niya. Ngunit maniniwala nga ba siya rito-sa damdaming muling tumitibok-o mas mangingibabaw ang sumpang humubog sa kanyang isipan? Story Started: June 19, 2026 Story Ended: ...