May mga pagmamahal na parang Aurora Borealis- minsan lang magpakita, ngunit habang buhay mong hahanapin. Isang beses mo lang siyang masisilayan, ngunit sapat na iyon para baguhin ang paraan ng pagtingin mo sa pag-ibig. Para kay Aeris Elana Estrella, si Kalvin Rafael Calderon ang kanyang Aurora- isang liwanag na dumaan sa kanyang buhay nang hindi inaasahan, at iniwan siyang kumakapit sa alaala ng minsang naramdaman. Hindi sila naging sila. Walang malinaw na simula, at lalong walang maayos na wakas. Isang kwentong natigil sa gitna- puno ng mga salitang hindi nasabi, at damdaming hindi naipaglaban. Ngunit paano kung ang isang pag-ibig na tinanggap mong tapos na... ay hindi pa pala handang magpaalam? Sa muling pagkrus ng kanilang landas, mabubuhay ang isang kwentong matagal nang tinakasan- at isang damdaming pilit nilang kinalimutan. Sa pagitan ng nakaraan at kasalukuyan, haharapin nila ang tanong na matagal na nilang iniiwasan: maaari pa bang ituloy ang isang kwentong minsang nahinto- o may mga pagmamahal talagang hanggang doon na lang? O mananatili na lang silang alaala- tulad ng Aurora sa kalangitan, maganda... ngunit hindi kailanman mahahawakan?