Pamagat: ISANG PAGKAKATAONG KAPILING KA Akda ni: GODDESSTHEOPHANIA (TIFFANY) THE MORE you try, the more chances of winning. Hindi alam ni Travis na ang gano'ng paniniwala ay dadalhin siya patungo kay Yuchizi. Puno dapat ng kaligayahan ang bawat yugto ng buhay. May dumating mang mga pagsubok, dapat na mas nangingibabaw pa rin ang saya. Gano'n na gano'n ang motto ni Travis Montero sa buhay. 'Yon ang puno't dulo ng pakikipag-date niya sa iba't ibang babae at kung bakit hindi niya sine-seryoso ang salitang "pag-ibig". Dahil matagal nang wala ang ina, piniling maging matatag na babae ni Yuchizi Alcantara. Dahil siya ay ang editor-in-chief ng kanilang school publication, high-achiever, at competent, marami ang nag-iisip na sa salitang "success" lang nakatuon ang atensiyon niya. Ang hindi nila alam, naghahanggad din siyang makahanap ng taong pwede niyang takbuhan, sandalan, at yakapin sa tuwing tila hindi na niya kakayanin. Dalawang landas ay nagtagpo sa magulong paraan, para sa maling dahilan. Sa gano'ng sitwasyon, posible bang may mabuong pagmamahalan? At totoo kayang sa bawat bagay ay may tamang pagkakataon? Kung oo, kailan? Sa papaanong paraan? Baka . . . baka lang . . . mangyari iyon sa paraan at panahong hindi inaasahan. Baka bukas, o sa susunod na araw, o sa susunod na kabanata. O sa isang pagkakataong makapiling nila ang isa't isa. Sa likod ng mga posibilidad, isa lang ang sigurado: tadhana lang ang nakakaalam.

Pamagat: ISANG HALIK MULA SA 'YO Akda ni: GODDESSTHEOPHANIA (TIFFANY) SEVEN MINUTES in heaven. Gano'ng laro lang pala ang sisira sa samahan nina Winter at Sunny. Dahil sa malambot na pananalita at pagkilos, napagkakamalan ng iba na bakla si Aldwin Lester Clavez. Wala siyang pakialam sa opinyon ng iba. Ang hindi niya matanggap ay ang maging katatawanan ng grupo kaya't ilag siya sa marami. Mataas ang pride ni Sunshine Rae Agustin, kaya kapag ayaw sa kanya ng tao, tiyak na mas ayaw niya rito. Hindi niya kailanman naramdamang kailangan niyang maging palakaibigan sa iba. Ni wala sa kanya kung walang manatili sa tabi niya. Ang kanyang ganda at kumpiyansa, sapat na 'yon para mabuhay siya. Hindi magkaaway, hindi magkaibigan. Ganyan ang relasyon ng dalawa. Inakala nilang kahit na gano'n, matatag ang pagsasama nila. Pero . . . Halik ng isa't isa lang pala ang tatapos ng lahat.

Pamagat: ISANG HAKBANG PATUNGO SA 'YO Akda ni: GODDESSTHEOPHANIA (TIFFANY) MATAGAL NANG gusto ni Summer Galvez ang kanyang kapit-bahay na si Xander Kyle Mendez. Makailang beses mang sinubukang aminin ang nararamdaman, sa tuwing nariyan na ang pagkakataon, tila kusang umuurong ang kanyang dila. Dala ito ng kaba. Dala ng takot. Siguro dahil . . . alam niyang malabong magkagusto rin ito sa kanya. Naniniwala si Sky Mendez na sa buhay, give and take dapat. Dahil mabuti si Summer sa kanya, ginagawa niya ang lahat ng makakaya upang masuklian ito. Pero kahit ano'ng pigil niya, hindi niya maiwasang mainis nang husto rito. Baka dahil . . . nakikita niya sa babae ang kanyang sariling ina. Masyadong mahinhin, masyadong mapagmahal. At hindi niya 'yon gusto.