ANG HULING KABANATA

Kwento ito ng dalawang lalaking Pinoy na naghahangad na pukawin ang natutulog at nanlalamig na puso ng bawat Pilipino sa pamamagitan ng isang mapangahas at mapanganib na paraan.
Ang isa ay syang utak, habang ang isa naman ay syang magpapatupad.

Nagsimula ang kwento sa bahay nang unang lalaki. Inaakala ng kanyang pamilya na naghahanda sya para maghanap ng trabaho, pero hindi nila alam ay naghahanda na pala sya para sa kanilang plano. Habang papunta sa Makati ay ibinabahagi ng unang lalaki ang ilan sa kanyang mga pananaw tungkol sa ugali o kultura ng Pilipino. Minsan ay kinikwento naman nya ang kanyang mga nakaraan.
Matatapos ang kwento ng unang lalaki sa oras na maisakatuparan na ng ikalawang lalaki ang kanyang misyon.

Ang kwento naman ng ikalawang lalaki ay magsisimula rin sa kanyang pinagtagpi tagping bahay. Iniwan nyang natutulog ang kanyang mag-iina at hindi na nagpaalam pa dahil alam nyang pipigilan sya ng mga ito na umalis ng bahay.
Lalakarin ng ikalawang lalaki ang mahabang daan papunta sa destinasyong pinag-usapan. At sa kanyang paglalakad ay sari saring pagsubok ang kanyang haharapin. Pero sa huli ay makakarating din ang ikalawang lalaki sa kanyang pupuntahan. At doon matagumpay nyang sinakatuparan ang kanyang misyon.

Sa huli ay malalaman ng bawat pamilya ng dalawang lalaki kung ano ang nangyari sa kanilang dalawa. Ang una, ay mapagtatagpi tagpi ng mga nasa awtoridad na ang una palang lalaki ang utak sa lahat ng kaguluhang naganap. Samantalang makikita naman sa telebisyon ng pamilya ng ikalawang lalaki ang kanyang sinapit.