Bir Amneziyakdan Keçmişə Qeydlər: MARSA MARŞ

Bir müddət öncə sırf təsadüf nəticəsində, gələcəkdə yaşayan və amneziyadan əziyyət çəkən bir zaman səyahətçisinin yaddaş kitabçası keçdi əlimə. Hal-hazırda həmin şəxsin harada, nə işlə məşğul olduğu məlum deyil. Amma bu yaddaş kitabçası olmadan çox yaşayacağına əmin deyiləm, əgər onda kitabçanın ikinci bir nüsxəsi yoxdursa.

Gündəliyin olduqca qəliz və anlaşılmaz dillə yazıldığını nəzərə alaraq ona müəyyən xırda dəyişiklər etmişəm və nisbətən oxunaqlı hala gətirmişəm. Həmçinin bəzi qandondurucu dəhşətlilikdə olan səhnələri əsərə daxil etməmişəm. Amma yenə də yaşı 18-dən az və ürəyi zəif olanların, biraz sonra oxuyacaqları hadisələri oxumamalarını şiddətlə tövsiyyə edirəm.

Diqqət! Bu əsərdə yazılanlar tamamilə gerçəkliyi əks etdirir; adı çəkilən şəxslər və hadisələr mütləq şəkildə olacaq.