Whirlwind Romance in Paradise Beach

Whirlwind Romance in Paradise Beach

By: Sweetlessage

Isa si Maring sa libo-libong tao na gustong maging isang manunulat. Ngunit dahil sa kakulangan niya ng karanasan sa pag-ibig ay hirap siyang isakatuparan ang pangarap niya.
Ngunit isang gabi, isang kakatwang panaginip ang napanaginipan niya. Sa panaginip na iyon ay kaniig niya ang isang lalaki sa isang mala-paraisong isla. Nag-iwan iyon ng malaking palaisipan sa kanya.
Isang araw habang kausap niya ang kaibigan niyang si Alexandra, bigla na lamang niya itong niyaya na pumunta sa beach sa pag-asang mareresolba ang palaisipan sa isip niya. Sa paghahanap niya sa internet ng magagandang beach sa pilipinas, aksidente niyang natuklasan na nag-eexist ang isla sa kanyang panaginip.
Sa pagpunta niya doon, isang gwapong lalaki ang nakatabi niya sa eroplano. Iyon nga lamang ay saksakan ng yabang ito! Kaya imbes na kiligin siya, umikot lamang ang puwit niya sa sobrang inis dito. Naisip na lamang niya, isang oras lamang niya makakasama ito at pagkatapos niyon, hindi na muling magku-krus ang mga landas nila.
Ngunit sa pagdating niya sa Palawan, hindi pa man siya nakakarating sa kanyang destinasyon ay inabot na agad siya ng kamalasan.
At sa hindi niya inaasahang pagkakataon, ang lalaking mayabang na iyon ang siyang tutulong sa kanya. Binigyan siya nito ng pansamantalang trabaho bilang sekretarya nito. Nang magtanong siya kung saan ang magiging opisina nila, ang tanging sagot nito: “Sumunod ka na lang, I’ll take you to paradise.”
Saang paraiso kaya siya nito dadalhin? May posibilidad kayang may mabuong pag-ibig sa pagitan nila kung inis na inis siya rito?
O isa lamang iyong pantakip sa matinding atraksyon na nararamdaman niya?