Stuck With Me - Published under PHR

My First Published Novel under Precious Heart Romances.

"Walang araw na hindi ko pinangarap na maging akin ka."

Mahal na mahal ni Jane si Paolo. Kaya nang mag-propose ito ng kasal ay buong puso niyang tinanggap. Kaya lang, tuwing sasabihan siya nito na mag-set na ng date ng kanilang kasal, lagi siyang tumatanggi. Marami pa kasi siyang gustong gawin sa buhay.
Kampanteng-kampante siya sa pagmamahal ni Paolo sa kabila ng ilang beses niyang pagtanggi sa alok na kasal. Masyado kasi itong mabait at maunawain na nobyo at ramdam na ramdam niyang mahal na mahal siya nito.
Pero mali pala si Jane sa pag-aakalang laging makauunawa ang nobyo. May hangganan pala ang lahat. Napagod ang taong labis-labis na nagmamahal sa kanya. Isang araw ay nakipag-break si Paolo, sinabing hindi na nito kayang maghintay.
Nagsisi si Jane na nagpatumpik-tumpik pa siya sa pagkakataong pinalampas niya na makasama habang-buhay ang minamahal. Lalo na nang may umeksenang maganda at seksing babae kay Paolo.
Nag-panic ang puso niya! Hindi siya makapapayag. Handa siyang lumaban mabawi lang ang lalaking dati naman nang nakalaan para sa kanya.