Pebbles of Mystery

Umapak siya sa sagradong lugar.

Ang kanyang presensya ay mistulang isang munting tulo ng tubig sa tahimik at malinaw na lawa. Ang paggalaw ng tubig sa kanyang pagdating ay isang gambala sa mapayapang lugar. Dumaan ang hangin at pumagaspas ang mga sanga at dahong nakapaligid. Nagambala ang mga aninong nagbabantay sa mga sulok dahil sa pagdating ng hindi imbitadong bisita.

Mga bantay ng kagubatan, mga sinaunang nilalang na naninirahan sa lugar, mga tagapangalaga sa matagal ng panahon.

Hindi sila mabuti.

Hindi sila masama.

Ngunit pansin ang panginginig ng hanging nagsasalamin ng kanilang pagkakagalit na maaaring mula sa panghihimasok o maaring may iba pang malalim na kadahilanan.

Malakas na misteryosong pwersa ang tumama sa kanya at agad siyang napamulat sa katawan niyang lupa. Isa itong malinaw na babala. Sa biglaang pangyayari, nawalan siya ng sariling balanse habang napatingala na lamang sa mga nagsama-samang nagdidilim na ulap sa kalangitan at nagbibigay kulay-abo sa buong paligid.

Patuloy pa rin ang pagbuhos ng ulan sa lupa, na kanya ring inaasahang kababagsakan.