El Amor Es Magnifico

Perpekto na sana ang buhay ni Rosenta Buenavides dahil halos lahat ay nasa kaniya na bilang isang anak principalia. Ngunit ang tanging hangad lamang niya ay ang matupad ang pangarap na maging isang bantog na mananayaw balang-araw na siya namang tinututulan ng kaniyang ama't-ina. Ang nais ng mga ito ay maaga siyang mamulat sa murang edad kung paano ang isang maging mabuting asawa ng aristokratong si Plaridel Altamonte na siyang ipinagkasundo sa kaniya.

Kaya naman nang makilala niya si Simeon Katigbak na isang indiyong mang-aawit na nangangarap maging isang tanyag na musikero, at suportado ng sarili nitong mga magulang, ay kagyat siyang nagkaroon ng pag-hanga sa binata dahil sa determinasyon nitong matupad ang minimithing pangarap sa kabila ng karukhaan. Magkaiba man ang takbo ng kanilang mga buhay ay hindi naging hadlang iyon upang sila'y pagbuklorin ng tadhana sa tulong ng makapangyarihang mga ritmo at melodiya ng musika.

Subalit ang kanilang pag-iibigan ay hinahadlangan ng karamihan. Gayunman, nananatili itong matatag at hindi matitibag ng anoman─kahit pa ang pinaka-malaking kalaban na nila ay ang kalikasan.