Sa Hindi Pag-alala

Sa murang edad pa lamang ay namulat na si Luna sa kalupitan ng mundo. Hindi niya ginugol ang kanyang kabataan sa pakikipaglaro kasama ang kanyang mga kaibigan. Sa halip, inaasikaso niya ang mga bisitang dumadating tuwing may lamay na magaganap sa kanilang bahay. Wala siyang kaalaman sa mga pambatang palabas dahil ang tanging napapanood niya ay ang sunod-sunod na paglisan ng kanyang pinakamamahal na pamilya.

Ilang beses nang sumagi sa isipan niyang sukuan na ang kanyang buhay ngunit alam niyang hindi iyon ikatutuwa ng kanyang kuya kaya naman kahit salat sa pera at durog ang puso, ginawa niya ang kanyang makakaya upang maitaguyod ang kanyang sarili. Isa siyang masipag na mag-aaral sa umaga at isang matiyagang waitress naman sa gabi.

Ngunit 'tila nayanig ang mundo ni Luna nang malaman niyang siya lamang ang makakapagpalaya sa isang lalaking nakulong sa ibang dimensyon na siya lang rin ang nakakakita.

Kaya niya pa rin bang palayain ang lalaki kapag nalaman niya ang dahilan kung bakit siya naparusahan?

Kung sakaling mahulog siya para sa kanya, papalayain niya pa rin ba siya kahit na ang ibig-sabihin n'on ay ang pagkalimot nila sa isa't-isa?

Ito ang kwento ni Luna at ng lalaking may mabigat na pagkakasala ngunit nagpaliwanag pa rin sa kanyang madilim at malamig na mundo, si Sol. Magwawakas ba ang kanilang istorya sa pagtatagumpay o sa hindi pag-alala?

©ErinnePJ