The Beautiful Target (Protector Series 3)
Mabait, masipag, at pinagpala ng kagandahan, ganyan ilarawan ng mga kaibigan niya si Elliana Marie de Leon o Ellie. Bibingo na sana siya sa kasuwertehan kaso malas siya pagdating sa pag-ibig. Kung hindi basagulero, ay notorious womanizer naman o 'di kaya ay stalker ang mga nagiging nobyo niya. At dahil parang pinagsakluban ng langit at lupa ang kapalaran niya sa mga lalaki, naisipan niyang maglunoy sa alak isang gabi.
Ang kaso, nabiktima siya ng mistaken identity nang muntik na siyang ma-kidnap sa bar na pinuntahan. Ang akala niya, katapusan na niya kaso may knight in shining armor pa pala sa katauhan ni Ivan Sandoval. Guwapo ito, matangkad, misteryoso, at may mga matang sing-itim ng gabi. Kaso, may pagka-antipatiko. Sinagip lang pala siya nito upang ikulong sa presinto dahil sa pag-aakalang isa siyang prostitute at drug addict! Abot-langit tuloy ang inis niya rito. Hiniling niya sa langit na sana h'wag nang muling mag-krus ang kanilang landas. Kaso pati 'yata panalangin niya sablay na rin nang matagpuan na lamang niya ang sariling nakikitira sa bahay ng lalaki matapos siya nitong muling sagipin sa mga 'kidnappers' niya.
"Don't worry you're safe with me," sabi pa nito.
Safe? Duda siya. Dahil sa kabila ng inis na nararamdaman niya sa lalaki, ganado sa pagtambol ang puso niya tuwing napapalapit siya rito. Mukhang willing magpabihag kay Ivan ang puso niya anumang oras. Delikado!
Date posted: August 31, 2019
