THE TALE OF ZERO MCKENLY (Proofread and Revised Edition)

Sa pagkakaalam ng pamilya ni Paulette Angeles, nagtatrabaho siya sa siyudad bilang isang call center agent. Ang hindi nila alam, isa lamang itong kasinungalingan. Sa loob ng nakalipas na siyam na taon, naging isa siyang babaeng bayaran at nakatali ngayon ang buhay sa kontrata ng isang lider ng sindikato.

Kinalimutan niya na ang sarili at naging ganito na ang araw araw na sistema sa kagustuhang mapagtapos ng pag-aaral ang kaniyang kapatid. Hanggang isang araw sa hindi inaasahang pangyayari, magbabago ang kaniyang buhay at ang mundong kaniyang ginagalawan. Ito ay matapos niyang madatnan sa labas ng pintuan ang isang package na nakaaddress sa apartment niya.

Hindi niya alam kung bakit ito pinadala at bakit napunta sa kaniya. At nang kaniyang buksan ang laman ng kahon, hindi niya inaasahan ang tatambad sa kaniya⸺isang manika na bukod sa pinagpala sa pisikal na anyo ay may mga nakatago rin palang madilim na kwento sa likod ng kaniyang metal na maskara.