KARAANG NAPTA

Namugna ang NAPTA aron paghatag kanimo'g kalingawan ning malaayong baktas sa kalibutan basin pa magaan-gaan ang mga buluhaton nga imong ginadala ug matumbuyan sa katawa ug kalipay ang mga kasakit sa imong kasingkasing.

Ang dakung matuod mao nga kitang tanan adunay tagsa-tagsa ka krus ning kinabuhi. Ang hataas ug pailub, ang maantigong mogamit sa gahum na gigasa ni Bathala kanato. Ang malisang sa kakulian... Sa katapusan kanang tawhana mosangput sa iyang tinguha. Modaug ikaw kon kanunay mainom ang imong pagtuo sa gahum sa Ginoo. Ang imong kadaugan sa laktud na pagkasulti. Anaa ra gayud kana kanimo ug sa pagbulig sa atong magbubuhat. Walay labot ang Napta.

Moambit lang kita ning gikalingawan sa atong mga ginikanan. Agi hatag paghandum sa ila... Usa ka timaan nga sila dili ug dili gayud mapala sa panid sa atong kinabuhi. Nga sa kalig-unan sa atubangan sa pagdagsa sa bag-ong mugna sa panahon, wala ta tamaya ang ilang mga pagtuo ug hunahuna.

Kon ikaw usa ka batan-on pa kaayo, malingaw ka sa napta tungod kay usa daw ka basahon na makatukas sa imong umaabot. Sa usa daw ka pagpamilok makita mo ang mahimayaong katumanan sa imong daghanan nga mga damgo. Kon ikaw usa ka ulitawo o dalaga, magasukwak sa kalipay ang imong kasingkasing samtang mahulagway mo sa hunahuna ang katahum ug kalalim sa mga hiyas sa kapikas nga maimo hangtud sa kamatayon.

Ihibalag mo ang mga tubag sa mga pangutana sa kasamok sa imong katulogon ug sa pagpahulay. Kon ikaw minyo o tigulang na, mahituka o mahitukma ang mga asoy sa Napta sa imong batasan, hiyas, tinguha, kadaugan ug kapakyasan sa kinabuhi. Mobalik sapanumduman ang unang mga adlaw kanus-a naglumid ang kalag sa gugma ug katam-isan ug dili lang nimo hibaw-an, magsubli-subli ka sulod sa imong hunahuna sa mga kataw-anan ug makasubong higayon sa imong kinabuhi ingon man sa imong minahal nga kapikas.

By: BRIGIDO B. ALFAR