SO SARTSE

"Sonka yayi min SARTSE, bani da magani sai ranar da ka furta min kalmomi uku, na kasance a cikin makaunyar soyayyarka wanda bana iya sarrafa zuciyata kan ganin na kuɓuta daga tarkonka, zanyi farin ciki idan kaine zaka kashe ni, ka datse numfashi na, na zama babu ni a doran Ƙasa....

Cewar Mubeena ta durƙushe bisa gwiwarta, tana rusa kuka mai tsatsani da gunji.

Nan take iska mai ƙarfi ya shiga kaɗa bishiyoyi tamkar zasu karye. Hannu yasa ya kare idanunsa gudun kar wani ƙura ya samu gurin shiga. Jikinsa ne yayi matuƙar sanyi zuciyarsa na tsananin bugu kamar zai faso ƙirjinsa ya fito waje, ya gama tsorata da lamarin Beena, bai tsammaci son da take masa ya kai wannan mizanin a zuciyarta ba, haƙiƙa ya tabbatar da SO SARTSE ne ga mutanan da ya yi nasarar sarƙaƙe zuciyarsu, musamman Beena da take durƙushe a gabansa. Sai ya shiga tunanin abinda ya kama yayi domin kansa ya kulle, tausayinta ya shige shi ya soma ratsa dukkan ɓargon jikinsa, sai dai bai jin zai iya sauya ra'ayinsa bisa abinsa ya ƙuduri aniyar aiwatarwa.

'Me yasa nake tausayinta haka?'