TEARS OF DEATH

Nagising ang isang binibining hindi malaman ang dahilan pagkat parang nanggaling na siya sa isang kamatayan.

Imbes na mapadaing sa sakit ay tila ginhawa ang kanyang naramdaman. Wala siyang maalala sa nangyari sa kanya dahil tila ba'y kusa itong nabura at pawang may pumipigil dito para wala na siyang malaman pa.

Unti-unti niyang binuksan ang mga mata pero nagulat siya kalaunan dahil parang naging kakaiba ito. Dalawang kulay ang nakikita niya sa kanyang bisyon. Walang iba kundi kulay puti at itim.

Napalinga-linga siya sa paligid wari'y winawaksi na baka panaginip lang ito at hihintayin niya nalang na magising.

Wala namang masakit sa kanyang katawan kaya napagdesisyonan niyang tumayo ngunit laking gulat niya ng wala siyang mga saplot. Kitang-kita ang hubog ng kanyang katawan na tila'y isa siyang modelo. Hindi niya nalang ito pinansin at nagpatuloy sa paglalakad.

Pansin sa kapaligiran ang natuyong lupa na nagkabitak-bitak---tuyot na tuyot na para bang hindi nadaanan ng tag-ulan. Ang mga punong kahoy na wala ng mga dahon--- maging ang bawat katawan nito'y tila marupok at isang pitik lang ay tuluyan ng matutumba ito. Ang mga halaman naman ay nililipad dulot ng mainit na hangin. Kitang kita rin doon ang mga iba't ibang klaseng hayop na nakahandusay.

Pinagmasdan niya ulit ang lugar na kanyang kinatitirikan. Patay na ang lahat at ang ibig sabihin nito ay ang kagubatang kanyang kinalulugdan ay wala na ring buhay.

Sino siya at ano ang misteryong bumabalot sa kanyang pagkatao?