عيناها تجيد الكلام

مقدمة✨

"احداث الرواية من وحي الخيال والشخصيات خيالية"

حنتكلم ع ابرز الشخصيات وحنوصف شكلهم زي ما راسمتهم ف خيالي

هاجر بنت من مواليد 98 قارية تانوي ومستواها كويس بس عيلتها بسبب تقاليدهم وعاداتهم وتشددهم فرضو عليها انها تكمل التانوي وتوقف مشوار الدراسة وتلتفت للجواز وللحياة البيتية زيها زي كل بنت من عيلتها.
هاجر تلعب دور البنت المتواضعة والطيوبة بس طبعها صعب وماتحبش تنافق وتجامل وكلمتها ع راس لسانها وهدا سبب مشاكلها يعني بالمختصر لسانها طويل وكلمتها تقولها لأي حد مهما كان يكون
عنايدية نوعا ما ، ولما تحط حاجة ف راسها ماترتاحش لين اديرها، حتى ولو كانت عارفة ان الحاجة هده حتسببلها مشاكل .
بس رغم كل هدا معروف عليها الرقة والصوت الهادي، وحتى ف عز مشاكلها وعراكها ديما محافظة ع هدوئها وتتعامل ببرود
نوعها من البنات المغامرات ، اي حاجة تخطر عليها وتبي اديرها اديرها ولو ع قطع رقبتها رغم ان عيلتها متشددين وصعبين هلبااا
بس كانت عنايدية واللي تبيه اديره وأكتر وحدة في خوتها اللي تهزبت وماتملش وماتهداش

ملامحها جذابة ، والجاذبية كلها في بشرتها الحنطية الناعمة والصافية زي بشرة الاطفال ، عيونها سود ورموشها طوال ، عيونها حلوات وزايدين ف جمالها ، شعرتها ناااعمة معبية ونازلة لنهاية الظهر وفيه لمعة حلوا تعطي ف لون بني هافت مع لمعة ذهبية ، مش طويلة ومش قصيرة ، جسمها مخصر وحلو
_____________
يوسف شاب م 90 خريج صيدلة ويشتغل ف شركة ادوية وفاتح صيدلية صيغرة ليه بس مش هو اللي يشتغل فيها
وهو شخص هادي و خجول شوية ومش متع بنات ومايعرفش حتى كيف يهدرز معاهم واغلب الاحيان جدي ولما يتعصب يبدا انسان تاني
طبعه مش بصايري هلبا ومش ديما يضحك بس مع هدا دمه حلو ويخش للخاطر حتى بالهدرزة العادية
عملي ويحب يخدم من صغره ومعتمد ع نفسه وحتى عيلته شبه معتمدين عليه ف هلبا حاجات
اسمراني والحية مرسومة ، نقش ع القهوي وعيون بين القهوي والعسلي
كريزمه حلوااا ، شخصيته واسلوبه وبرستيجه ليه لون خاص
_______________
أحداث الرواية تتمحور ع الفرق بين فئة الناس المتشددين ف الدين والناس العادية ، تعتبر رواية من لون خاص ، توضح علاقة الحب مع العادات والتقاليد والتشدد ف الدين ، قريبة من واقعنا وحياتنا .

انشالله تعجبكم❤

#للكاتبة_تمار