កូនក្រមុំក្នុងបណ្តាំមរតក

យូតា គឺជាកូនស្រីចិញ្ចឹមតែមួយគត់របស់ វីលៀម ក្លារីតុន។ នាងជាក្មេងស្រីស្លូតត្រង់ ចិត្តល្អបរិសុទ្ធ មានអ្នកស្រឡាញ់រាប់អានស្ទើរគ្រប់គ្នា ប៉ុន្តែបែរជាត្រូវក្លាយទៅជាមនុស្សស្រីរំអ៊ួយ គួរឲ្យស្អប់នៅក្នុងក្រសែរបស់ ស៊ុកជីន ក្លារីតុន ទៅវិញ។ អ្វីដែលកាន់តែធ្វើឲ្យនាងក្លាយទៅជាមនុស្សគួរឲ្យស្អប់ នៅក្នុងភ្នែករបស់ អ្នកកំលោះកាន់តែខ្លាំងនោះគឺបន្ទាប់ពីឪពុករបស់គេលាចាកលោកទៅ នៅក្នុងបណ្តាំមរតកបានតម្រូវឲ្យអ្នកកំលោះរៀបការជាមួយនាង។

"ខ្ញុំស្អប់នាងខ្លាំងណាស់ យូតា!" ប្រយោគមួយនេះដែលចេញពីមាត់របស់ ស៊ុកជីន តែងតែស្វាគមន៍ យូតា មករហូត។ មិនថាពេលណាដែលគេចួបនាង គឺអ្នកកំលោះតែងបោះពាក្យសម្តីបែបនេះទៅកាន់នាងជានិច្ច។ យូតា បានត្រឹមងើយមុខឡើង សម្លឹងមនុស្សប្រុសនៅចំពោះមុខ ជាមួយអារម្មណ៍ឈឺអួលណែនពេញក្នុងទ្រូង។