Sonun Başlanğıcı

Bizə görə mövcud hesab etdiyimiz hər şeyin, eyni zamanda ona əks olan tərəfi də mövcuddur. Ölüm - həyat, xeyir - şər, ağ - qara, işıq - qaranlıq, isti - soyuq, başlanğıc və son kimi. Bizə görə zaman bir nöqtədə başlayırsa, bir nöqtədə bitir. İnsan dünyaya gəlirsə, ölür və ya daha geniş anlamda fərz etsək, kainat, qalaktikalar, planetlər, bəşəriyyət mövcud olursa nə vaxtsa məhv olur. Bunu, mövcud olan bütün səmavi və qeyri-səmavi dinlər "qiyamət" olaraq adlandırır.

Başlanğıc və son. Zaman bir nöqtədə başlayıbsa, həqiqətənmi bir nöqtədə bitəcək ? və ya həqiqətənmi zaman bir nöqtədə başlayıb ? Ya hər iki tərəfin daha ötəsində bizim beynimizin yetərsiz qaldığı bir "döngü" mövcuddursa ? Başlanğıcdan daha əvvəl, sonsuz sayda başlanğıcların olması kimi. Ya da, bizim "son" olaraq adlandırdığımız şey baş verdikdən sonra yeni bir başlanğıcın olması kimi...

Hal hazırda mövcud olduğumuz zaman dilimi böyük bir təhlükəylə qarşı - qarşıyadır. Bu prosesin gələcəyə olan təsirinin qarşısının alınması üçün insanlar əllərindən gələni edirlər. Xəbərsiz olduqları tək şey isə, etdikləri hər şeyin, insanlığın məhvinə gətirib çıxaracağıdır. Hekayə, Fransanın şimal-qərbində yerləşən La Ronde qəsəbəsinə, yay kampusu üçün yollanan, müxtəlif millətlərdən bir qrup tələbənin, bütün dünyada yayılmaqda olan təhlükəli infeksiya səbəbi ilə 2 ci dünya müharibəsindən qalma bir bunkerə karantinə alınmasıyla başlayır. Bir müddət sonra, yeraltı bunkerin, çöldə olub bitən hər şeylə əlaqəsi kəsilir. Həm tibb işçilərinin, həm də ki ərzaq gətirən xüsusi işçilərin, bunkerlə əlaqəsi kəsilir. İçəridə bağlı qalan 12 nəfər tələbə və 3 nəfər müəllim, bunkerdən qurtulmaq üçün çıxış yolu axtarır.