شعر

اجمل ماقاله الشاعر خضير هادي

اشتهيت الموت مثل اكله اشتهيت الموت
مثل واحد يحبله بنيه بالبصرة وهو بيتهم بالكوت
بالغربة ويجيني الصوت
وين انت اشتهيت الموت
بنص بغداد اريد الموت
والجناز من يم الرصافة يفوت
وطلب اخر اطلبه والحجي بسكوت
لاتخلي قبغ لو باب ع التابوت
حتى اشتم هوا بغداد
خليني اشتم هوا بغداد واشهك شهكة اليركض
وماظنها قضيتي تفض
واكتل غربتي بيدي
وماظنها قضيتي تفض
ياجناز مر بيه على الكاظم ابو طلبه
حتى اشكيله بيه شسوت الغربة
وعلى الكيلاني مر بيه
وعلى ابو حنيفة مر بيه
وعلى الخلاني مر بيه
وعبرني الجسر للخضر بلكي ارتاحلي شويه
اشتهيت الموت مثل اكله اشتهيت الموت
مثل واحد يحبله بنيه بالبصرة وهو بيتهم بالكوت