Acacia's Fate

Kaya mo bang magmahal ng isang taong mahirap mahalin?

Noong una pa lamang makita ni Rosalind Luna Concepcion si Winston Nash Ravalez, nakaramdam na agad siya ng isang kiliti sa puso niya. Ngunit nang malaman niyang natatakot na ang lalaking magmahal muli matapos masaktan ng mga babaeng minahal ay talagang naawa siya rito. Mas lalo lamang siyang naging determinado para mas mahalin ito.

Gano'n talaga. Marurupok ang mga tao ngayon na kahit sinasaktan na nang paulit-ulit, nagpapaka-martyr para hindi maiwanan.

Ginawa lahat ni Rosalind para sumubok ulit si Winston na mahalin din siya. Nag-aral mag-commute, makipag-chat sa gabi kahit pagod na pagod galing eskuwela, bumili ng mga regalo kahit kapos na sa pera, at higit sa lahat, ang magpakatanga.

Na kahit alam niyang kumplikadong tao ang minamahal niya ay wala na siyang pakialam. Wala na siyang pakialam kung maubos pa ang sarili niya. Ang sarili niyang sa huli ay kanyang naiwala. Naiwala nang dahil sa lalaking hindi naman siya mamahalin kahit kailan.

Pero paano kung pinaglalaruan lang pala siya ng tadhana? Tadhana ng isang punong simbolo ng katatagan at katigasan kapag nagmamahal ang isang tao? Makakaya niya bang harapin ang sakit na magdudulot sa pagkawasak ng kanyang puso?