She's Dreaming

Si Aerich ay isang ordinaryong dalaga lamang ngunit kabilang sa pamilya na puno ng pagmamahalan at may sapat na yaman para maitaguyod ang kanilang pangangailangan sa araw-araw. Ang pangarap lamang niya ay makatapos ng pag-aaral at matupad ang kaniyang pangarap na maging isang mamamahayag balang araw. Subalit nang sumapit ang kaniyang ika-labinganim na kaarawan ay nagsimula ang kaniyang mga panaginip kasama ang isang hindi niya nakilalang lalaki. Isa itong istranghero para sa kaniya pero sa hindi malamang dahilan ay magaan ang loob niya dito. Ito na rin ang naging dahilan kung bakit nais na niyang matulog ng maaga. Gusto niya ang mga kwento nito lalo na ang unti-unti umano nitong pag-abot sa kaniyang mga pangarap; ang maging isang artista at tagapagtanghal sa entablado. Namamangha siya sa binata at naging inspirasyon para magsumikap na abutin din ang sa kaniya.Nakaramdam din siya ng kalungkutan dahil sa panaginip lang niya ito nakikita at nakakausap. Kapag nagising na siya ay hindi niya maalala ang mukha nito. Ang naiwan na lamang ay ang malamyos na tinig nito.
Paano kaya kung ang taong ito ay makita niya sa totoong mundo? maalala kaya niya ang pisikal na anyo nito? napapanaginipan kaya rin siya ng binata?